शनिबारको भूकम्पले ज्यान गुमाउनेहरुको शव धेरै भएपछि आर्यघाटमा शव जलाउन लाइनमा लाग्नु पर्ने भएको छ। भुकम्पमा परी ज्यान गुमाउनेको सामुहिक दाह संस्कार गरिने भनिएपनि सामान्य मृत्युवरण गरेको अन्तिम संस्कार गर्न कठिन भएको हो।
रामेछाप चिसापानीका राजकुमार कर्माचार्यका ८२ वर्षे बुवाको सोमबार दिउँसो राजधानीको ट्रमा सेन्टरमा निधन भयो। आर्यघाटमा सम्पर्क गर्दा जलाउन बाँकि शव धेरै भएकाले पालो आउने बित्तिकै खवर गर्छौं भन्ने उत्तर पाए। उनी आर्यघाटबाट कतिबेला पालो आयो भन्ने खबर आउला भनेर बुवाको शव कुरेर बसिरहेका छन्।
रामेछापमा रहेको उनको घर भत्केको छ। परिवारका सदस्य खुला आकाशमुनि पाल टाँगेर बसेका छन्।
‘गाउँमा घर भत्केर पालको बास भएको छ, यहाँ बुवाको शव जलाउन पाएको छैन्’, उनले भने।
आर्यघाटमा शव लिएर गए फेरि भुकम्प गएमा जोगाउनै मुस्किल हुने सोचेर उनले लास अस्पतालबाट बाहिर निकालेका छैनन्। ‘धेरै अनुरोध गरेर यहाँ राख्न दिएका छन’ उनले भने। उनको बुवाको शव राजधानीको ट्रमा सेन्टरको एक कुनामा राखिएको छ। त्यही कुनामा स्टेचरमा राखिएको बुवाको शव कुरेर बसिरहेका छन्।
