विद्युत् चुहावट कम गर्न विद्युत् प्राधिकरण कार्यालय इटहरीले आफ्नो सेवा क्षेत्रभित्र विद्युत् चोरी नियन्त्रण अभियानलाई तीव्रता दिएको छ। सोही क्रममा कार्यालयले चोरीको विद्युत् प्रयोग गरी चलाइएका टिभी, फ्रिज, पानी तान्ने मोटरलगायत ४३ थान विद्युतीय सामाग्री बरामद गरेको छ।
चोरी नियन्त्रण गर्ने अभियानस्वरुप सुनसरीको पकली तथा रामधुनीभासीका विभिन्न ३५ वटा घरमा छापा मारी कार्यालयले सो परिमाणमा सामान बरामद गरेको हो। बरामद गरिएका सामानहरुमा १० थान टिभी, ८ थान फ्रिज, १८ थान पानी तान्ने मोटर, पंखा, आइरन, स्टेपलाइजर, राइसकुकर लगायत छन्।
इटहरीस्थित विद्युत् प्राधिकरण कार्यालयका प्रशासकीय अधिकृत राम पोख्रेलको नेतृत्वमा गएको कर्मचारी तथा प्रहरीको टोलीले बरामद गरेर ल्याएका ती सामान सार्वजनिक गरेको हो। विद्युत् चोरी गर्न नपाइने भएपनि हुक लगाएर विद्युत् प्रयोग गरेका घरधनीहरुलाई सचेत गराउँदा गराउँदै पनि नमानेपछि कारवाही गर्नुपरेको पोख्रेलले बताए।
‘मिटर राख्ने नजिकैका घरमा गएका बेलामा हाम्रो कर्मचारीले पटक पटक सचेत गराएका थिए,' उनले भने, ‘अटेर गरेर चोरी गर्नेको घरबाट विद्युतीय सामाग्री बरामद गरेका छौं।' उनका अनुसार प्रायः घरधनीले घर भर्खरै बनाइएको र मिटरका लागि निवेदन दिइरहेको भन्दै बहाना बनाएका थिए। ‘तर घर हेर्दै थाहा हुन्छ, तीन वर्षभन्दा पहिलेदेखि नै चोरी गरिरहेका थिए,' उनले भने।
बरामद गरीएका सामानको कुल मुल्य दुई लाख ३२ हजार रुपैया रहेको छ। बरामद सामानको मुल्यांकन र विद्युत् लोडका आधारमा जरिवाना गराइने कार्यालयले जनाएको छ। हुकिङमार्फत् हुने चोरीका कारण एक देखि दुई प्रतिशत विद्युत् चुहावट भइरहेको कार्यालयले जानकारी दिएको छ।