काठमाडौंको टुँडिखेलमा भोलि(शुक्रबार)देखि सुरू हुने योग शिविरका लागि भारतीय योग गुरू रामदेव आज काठमाडौं आउँदै छन्।
उनी दिउँसो ३ बजे काठमाडौं आइपुग्ने पतन्जली योगपीठ नेपाल ट्रस्टका शालिकराम सिंहले जानकारी दिए। रामदेवले आजै अपरान्ह साढे ३ बजे त्रिभुवन विमानस्थलमा पत्रकार सम्मेलन गर्ने कार्यक्रम छ।
त्यसपछि उनी सिधै सन्त निवास आश्रममा जाने कार्यक्रम छ। त्यहाँ राति भारतीय राजदूत र केही उच्च पदस्थ नेताहरुले उनलाई भेट्नेछन्। योग शिविरको भोलि बिहान पौने ५ बजे राष्ट्रपति रामवरण यादवले उद्घाटन गर्दैछन्। रामदेव बाबा शनिबार बागमती सरसफाई अभियानमा पनि सरिक हुँदैछन्।
बाबा रामदेव धुलिखेल, वीरगंज, जनकपुर जाने कार्यक्रम छ। यसअघि रामदेव ३ पटक काठमाडौं र १ पटक विराटनगरगरी ५ पटक काठमाडौं आइसकेका छन्।
सुरक्षा व्यवस्था कडा
बाबा रामदेव आउने भएपछि सुरक्षाको वस्तोबस्त गृह मन्त्रालयले मिलाएको छ। उसले रामदेवलाई सुरक्षा दिन आफू मातहतका निकायलाई निर्देशन दिइसकेको छ। सुरक्षाका लागि २ सय ५० भन्दा बढी प्रहरी परिचालन गर्ने सरकारको तयारी छ। जसमा केही सशस्त्र प्रहरीका अधिकृत र जवान पनि छन्। रामदेवको सम्पूर्ण सुरक्षा व्यवस्था मिलाउन आवश्यक प्रवन्ध मिलाइसकेका छौं, गृह मन्त्रालयका प्रवक्ता लक्ष्मीप्रसाद ढकालले सेतोपाटीसँग भने सुरक्षा दिनु राज्यको दायित्व पनि हो। बाबा रामदेवमाथि सुरक्षा थ्रेट रहेको उच्च प्रहरी स्रोतले दाबी गरेको छ।
धर्मका बारेमा बाबा रामदेवले बेलाबेलामा विवादास्पद अभिब्यक्ति दिने गरेको भन्दै उनीमाथि पनि सुरक्षा थ्रेट रहेको प्रहरी अधिकारीको बुझाई छ। पहिला विस्तारै बोल्ने र पछि बोल्दै जादाँ विवादीत विषयमा आफ्नो धारणा आपत्तिजनक अवस्थामा राख्ने बेलामा नेपालमा पनि उनीमाथि दुर्ब्यवहार हुँदैन् भन्न सकिन्न एक उच्च प्रहरी अधिकारीले भने, त्यही भएर सुरक्षा व्यवस्था पनि कडा पारेका छौं।
प्रहरी महानिरीक्षक उपेन्द्रकान्त अर्यालले महानगरीय प्रहरी आयुक्तका कार्यालयका डिआइजी विज्ञानराज शर्मालाई सुरक्षाको व्यवस्था मिलाउन भनेका छन्। अर्याल भने बिहानै निरीक्षणका लागि विराटनगर गएका छन्।
पहिलो पटक रामदेव आउँदाको किस्सा
पहिलो पटक रामदेव बाबा ८ वर्षअघि काठमाडौं आएका हुन्। त्यतिबेला पनि योग शिबिरकै लागि उनी नेपाल आएका थिए।
कार्यक्रमका लागि १ दिन रामदेव काठमाडौं आइसकेपछि तत्कालिन प्रधानमन्त्री गिरिजाप्रसाद कोइरालाको सरकारले रामदेवको कार्यक्रम स्थगन गर्न निर्देशन दियो। टुँडिखेलको कार्यक्रमका लागि हजारौंमानिसहरू काठमाडौं आइसकेका थिए।
तत्कालिन गृहमन्त्री कृष्णप्रसाद सिटौलाले काठमाडौंका तत्कालिन प्रमुख एसपी सर्वैन्द्र खनाललाई बोलाएर कार्यक्रम स्थगित गर्न आदेश दिए।
अन्तिम समयमा कार्यक्रम स्थगित गर्दा जनमानसमा नराम्रो असर पर्ने र सेक्युरिटी पनि कमजोर भएको सन्देश जाने भन्दै खनाल त्यहाँबाट बाहिरिएका थिए। धार्मिक कार्यक्रम स्थगित गर्दा हिंसा मच्चिनेसक्ने खनालको बुझाई थियो।
त्यसपछि एसपी खनाल प्रधानमन्त्री भेट्न बालुवाटार गए। कार्यक्रम स्थगित हुदाँ पर्ने असरबारे जानकारी गराए। त्यसपछि रिक्स लिएरै भएपनि कार्यक्रम गर्न सक्छौं त भनेर कोइरालाले भनेपछि खनालले सक्छु भनेर निस्किए।
त्यसबेला सरकारले नेकपा माओवादीको कारण देखाउँदै कार्यक्रम स्थगित गर्न आग्रह गरेको थियो।
निर्धारीत समयमा शिविर हुन सकेन। मानिसहरु राति १ बजेदेखि नै टुँडिखेलमा चकटी बोकेर आएका थिए।
सकभर खनालले कार्यक्रम रोक्न नै चाहेका थिए, तर, अन्तिम समयमा आएर त्यसो गर्नु सम्भव पनि थिएन, सिंहले भने खनालले नै सुरक्षाको रिक्स लिएपछि भोलिपल्ट कार्यक्रम भएको हो।
‘अग्रवाल भवनमा रहेका रामदेवलाई खनालले कार्यक्रम रोक्न पनि आग्रह गरेका थिए। तर रामदेवले बरु मलाई पक्राउ गर म कार्यक्रम रोक्दिन भनेपछि खनाल पछि हटेका थिए,’ सिंहले सुनाए।
‘खनालले त्यसबेला निकै चलाखपूर्ण तरिकाले बिहानदेखि दिनभर अग्रवाल भवनमा रामदेवलाई अनेक बहानामा भुलाए,’ सिंहले भने।
त्यसपछि निर्धारित समयभन्दा एक दिन ढिला कार्यक्रम सुरू भएपछि रामदेवलले मञ्चबाटै आफूलाई सुरक्षा थ्रेट भएर कार्यक्रम सरकारले रोक्न चाहेपनि नेपालको प्रहरी संगठन निकै दुस्तचुरुस्त भएको भन्दै प्रसंशा गरेका थिए।
