नयाँ वर्षमा कहाँ-कहाँ घुम्न जाने रोजाई तपाईँकै

भरतबन्धु थापा

चितवन

वाईल्ड लाईफ तथा थारू संस्कृति हेर्न रुची राख्नका लागि चितवन उपयुक्त हुन्छ। चितवनमा जंगल सफारी, हात्ती सफारी, चरा वाचिङ तथा थारु सस्कृतिका लागि प्रख्यात रहेको छ। एक रात दुई दिन वा दुई रात तीन दिनको समय उपयुक्त हुने गर्दछ। चितवन विदेशी पर्यटकको रोजाईमा पर्ने मात्र नभएर अहिले स्वदेशी पर्यटकको पनि रोजाईमा पर्ने गरेकेा छ।

जिरी

वरी परी डाँडा बिचमा बजार।

डाँडाँभरी मनै लोभ्याउने हरियाली जंगल, अनी फाँट। जंगलको विचमा सुन्दर बस्ती।

नेपालको स्वीजरल्याण्ड भनेर परिचीत जीरी पुगेपछी सबैले यस्को अनुभुती गर्न पाउँछन्। राजधानीबाट करिब दुई सय किलोमिटर टाढा रहेको जिरी पुगेपछी बेग्लै अनुभूती हुन्छ। जिरी बजार कुनै समयमा सगरमाथाको प्रवेशद्धारको रुपमा परिचित थियो।

विश्वको अग्लो हिमाल सगरमाथा जानका लागि जिरी बजार भएर मात्र जानु पर्थ्यो। तर, अहिले सोलुखुम्बुको नाम्चेमा एयरपोर्ट बनेपछि केही मात्रामा जिरी बजार सुस्ताएको छ। सगरमाथा जानका लागि पैदल यात्रुहरु भने अझै पनि यही बाटो भएर आउजाउ गर्छन्। यो क्षेत्रमा चिया, लोक्ता लगाएत हिमाली जडीबुटीका रुपले पनि निकै प्रख्यात छ।

लोमाङथाड

विश्वमा घुम्न जानलाई आग्रह गर्ने संस्था लोन्ली पलानेटले विश्को उत्कृष्ट दश मध्ये परेको स्थान हो लोमाङथाङ।

नेपालमा राजतन्त्र समाप्ती भएता पनि यो क्षेत्रमा राजा र राजपरिवारलाई गरीने सम्मान तथा मर्यादा अहिलेसम्म जारी छ। यो क्षेत्रमा हुने ठूलो पर्व तिजी र यातुङमा राजपरिवारको उपस्थितिमा मात्र हुने गर्छ।

यती मात्र नभएर यहाँ भएका गुफा तथा प्राकृतीक सौन्दर्यनै यहाँको प्रमुख आकर्षण हो। हिन्दु तथा बौद्ध दुबै धर्मावलम्बीहरुको साझा आस्थाको केन्द्र मुक्तीनाथ भएर जानुपर्ने हुन्छ लोमाङथाङ। यहाँको लागि १० दिनको समय उपुयुक्त हुन्छ।

नगरकोट

राजधानीबाट सब हिमाल हेर्न तथा एक रात बसोबास गर्नका लागि राजधानी सबैभन्दा उपयुक्त स्थल हो नगरकोट। काठमाडौंबाट १ घण्टा ३० मिनेटको सवारी यात्रामा पुग्न सकिने भएकाले पनि यो स्थान उपयुक्त हो।

नगरकोटमाबाट लाङटाङ हिमालको मनोरम दृश्यका साथै विश्वका उत्कृष्ट दश स्थान मध्ये एक हो सूर्य उदाएको हेर्नका लागि। नेपाल घुम्न आउने पर्यटकहरूको एक दिनका बास बसाई लागि रोजाईमा पर्ने स्थान मध्ये एक हो।

पाथिभरा देवी

धार्मिक हिसाबले निकै प्रख्यात रहेको पाथिभरा देवी मन्दिर ताप्लेजुङमा पर्छ। समुन्द्री सतहबाट ३ हजार ७ सय ९४ मिटर उचाईमा रहेको यो मन्दिरबाट विश्वको तेस्रो अग्लो तथा नेपालको देास्रो अग्लो हिमाल हेर्न सहजै सकिन्छ।

पाथिभरा मन्दिर परिसरमा बास बस्नका लागि उपयुक्तस्थल नभएको कारण फेदिमा बास बस्नुपर्ने हुन्छ। फेदीबाट ३ घण्टाको पैदल यात्रा पश्चात पुग्न सकिन्छ पाथीभरा मन्दिर परीसर। यहाँको लागि ६ दिनको समय उपयुक्त हुने गर्छ।

पोखरा

पोखरा भन्ने वित्तिकै पर्यटकको पहिलो रोजाईमा पर्ने स्थान हो। यहाँ सबै खालको पर्यटकीय आकर्षण भएले पनी यो क्षेत्र पहिलो रोजाईमा परेको हो।

यो क्षेत्रमा पुगेपछि आँखै अगाडि हिमाल हेर्न मात्र नभएर तालमा बोटीङ गर्न सकिन्छ। यती मात्र नभएर यहाँ गुफा हेर्न चाहनेले गुफा तथा साहसीक खेल रुचाउनेले प्याराग्लाईडीङ, अल्टा, बन्जी, जिप फलाएर जस्ता साहसीक खेलहरुको आनन्द लिन सक्छन्। यसका साथै धर्म प्रती रुची राख्ने पर्यटकहरुको विभीन्न धार्मिक महत्वका मन्दिरहरू बिन्ध्यबासीनी,बाराही मन्दिरसमेत रहेको छ। यो क्षेत्रमा एक रातदेखि ३ रातसम्म बिताउन सकिन्छ।

पुनहिल

धौलागिरी लगाएत दर्जनौ हिमाल आँखै अगाडि हेर्नका लागि सबैभन्दा उपयुक्तस्थल हो म्याग्दीको पुनहिल। समुन्द्री सतहबाट करिब ३ हजार मिटर उचाईमा अवस्थित पुनहिलबाट माछापुछ्रे, अन्नपूर्ण लगायतका १८० डिग्रीको कोणसम्म हिमालहरु देख्न पाईन्छ। यो क्षेत्र विश्व प्रख्यात अन्नपूर्ण पदयात्रा निस्कने पर्यटकहरुको जाने बाटोमासमेत पर्छ। यो क्षेत्र जानका लागि एक हप्ताको समय उपयुक्त हुनेगर्छ। पोखराबाट नयाँ पुलसम्म सवारी साधनमा त्यसपछि पदयात्रा सुरु हुन्छ।

र्‍याफ्टिङ

स्वदेशी तथा विदेशी पर्यटकका लागि साहासिक जलयात्राका लागि र्‍याफ्टिङका निकै प्रख्यात छ। विश्वमा र्‍याफ्टिङका लागि उत्कृष्ट दस स्थानमध्ये एक सिन्धुपाल्चोकको भोटेकोशी नदी पनि पर्छ।

सिन्धुपाल्चोकको भोटेकोशीमा र्‍याफ्टिङ दुई तहमा बिभाजन गरीएको छ। जुन तल्लो र माथिल्लो भोटेकाशी हो। माथिल्लो तहको भोटकोशी जानकारहरूको लागि रहेको छ भने तल्लो तहमा सबै प्रकारका मानिहरू जलयात्रा गर्न सक्छन्।

बिहान गएर र्‍याफ्टिङ गरेर फर्कनका लागि दुई हजार ५ सय रुपैयाँ लाग्छ। जस्मा यातायात र खाना, बेक्रफास्टको खर्च समेत जिडिएको हुन्छ। त्यस्तै एक रात दुई दिनको लागि जाने भए यातायात र खाना, बेक्रफास्टको तथा बसाईको ब्यबस्थापनका लागि ३ हजार ५ सय रूपैयाँ लाग्छ।

रारा

रारा नेपालको सबैभन्दा ठूलो ताल हो। दुई वटा जिल्लालाई समेटेर वि.स. २०३२ मा रारा तालकै नाम राखेर रारा राष्ट्रिय निुकन्ज समेत स्थापना भएको हो।

समुन्द्री सतहबाट २ हजार ९ सय ९० मिटर उचाईमा अवस्थित तालको प्रमुख विशेषता भनेको छिन छिनमा पानीको रङ परिवर्तन हुनु हो। पानीको रङ परिवर्तन बाहेक तालमा तीन प्रजातीका माछाहरू पाईन्छन्। तर, स्नो ट्राउट प्रजातीको माछा यो ताल बाहेक नेपालको अन्यत्र कही पनि पाईदैन।

यो तालको लम्बाई ५ किलोमिट र चौडाई ३ किलोमिटर हुनुका साथै गहिराई १ सय ६७ मिटर रहेको छ भने तालको क्षेत्रफल करिब ११ किलोमिटर रहेको छ। हिँडेरै फन्को मार्ने हो भने ५ घन्टा लाग्छ।

रारा पुग्नका लागि नेपालगन्जको राझा विमानस्थलबाट मुगुको ताल्चासम्मको हवाई यात्रा हुन्छ। त्यसपछि सुरू हुन्छ पैदल यात्रा। मुगुको ताल्चाबाट दुई घण्टाको सल्लाघारै सल्लाघारीको जंगल बीचको पैदल यात्रा पश्चात पुगिन्छ रारा तालको छेऊ।

प्रकाशित मिति: 2015-04-13 17:57:06

प्रतिक्रिया दिनुहोस्