स्वास्थ्य मन्त्रालयका सचिव शान्तबहादुर श्रेष्ठले देशका विशिष्ट व्यक्ति-भिभिआइपी, भिआइपीले सिधै विदेश गएर उपचार गराउन नपाउने भएको बताएका छन्।
भक्तपुरको गठ्ठाघरस्थित नागरिक कम्युनिटी टिचिङ हस्पिटलको छैठौं वार्षिक साधारणसभाको आज उद्घाटन गर्दै उनले सरकारले हालै मन्त्रिपरिषद्बाट यस्तो व्यवस्था गरेको बताए।
उपचारका नाममा विदेशमा धेरै पैसा गएको चर्चा बढेपछि भएको यस्तो व्यवस्थाले अब वीर अस्पतालमै उपचार गराउनुपर्ने व्यवस्था गरेको बताए।
सचिव श्रेष्ठले भने, ‘अब देशका भिभिआइपी, भिआइपीले पहिले वीर अस्पतालमा स्वास्थ्य परीक्षण एवम् उपचार गराएर यहाँ उपचार असम्भव भएमात्र विदेशका अस्पतालमा उपचारका लागि जान पाउने व्यवस्था गरिएको छ ।’
उनले स्वास्थ्य सेवा ऐन नहुँदा समस्या परेको बताउँदै सरकार सो ऐन ल्याउने तयारीमा जुटेको बताए। कर्मचारीको सेवासम्बन्धी ऐन मात्र भएको तर आम जनतालाई सर्वसुलभ सेवा पुर्याउने ऐन नभएको बताउँदै उनले स्वास्थ्य सेवा ऐन अति आवश्यक भएको बताए।
सरकारी अस्पतालको व्यवस्थापनमा राजनीतिक नियुक्ति गर्ने, अनावश्यक कर्मचारी भर्ति गर्ने, व्यवस्थापन चुस्त नहुने समस्या बढेकाले यसलाई रोक्ने ऐन ल्याउनु आवश्यक भएको सचिव श्रेष्ठले औँल्याए।
कार्यक्रममा अस्पताल सञ्चालक समितिका अध्यक्ष पुष्पमान अमात्यले गत फागुन मसान्तसम्म अस्पतालको सेयर चुक्ता पूँजी रु ११ करोड ४५ लाख ६२ हजार १०० पुगेको बताए।
अस्पतालले चालू आव २०७१/०७२ को प्रथम छ महिनामा रु चार करोड ७७ लाख ८९ हजार ३९० नाफा गरेको बताउँदै उनले आउँदो आवमा नाफा वृद्धि गरी रु ११ करोड ६३ लाख ५७ हजार पुर्याउने लक्ष्य लिएको बताए।रासस
