अत्यधिक रक्तश्रावका कारण आइतबार राति यहाँ एक सुत्केरी महिलाको ज्यान गएको छ। सुत्केरी महिलाको मृत्युपछि आक्रोशित बनेका उनका परिवारजनले अहिले दोलखा बजार र यातायात बन्द गराएका छन्।
रक्तश्रावका कारण दोलखाको सुन्ध्रावती गाविस–३ की ३० वर्षीया सुत्केरी सरिता मैनालीको ज्यान गएको हो। जिल्ला प्रहरी कार्यालय दोलखाका प्रहरी निरीक्षक सन्तबहादुर लामाका अनुसार सुत्केरी मैनालीको रक्तश्राव नरोकिएपछि थप उपचारका लागि एम्बुलेन्समा काठमाडौँ लैजाने क्रममा सिन्धुपाल्चोकको खाडिचौरमा मृत्यु भएको हो।
व्यथा लागेपछि मैनालीलाई उपचारका लागि आइतबार राति सदरमुकामस्थित गौरीशङ्कर जनरल अस्पताल ल्याइएको थियो। उक्त अस्पतालमा राति नै मैनालीले छोरा जन्माएकी थिइन् तर रक्तश्राव थामिएन । उक्त अस्पतालले मैनालीलाई राति नै काठमाडौँ पठाएको थियो।
चिकित्सक र अस्पताल प्रशासनको लापरवाहीका कारण सुत्केरी महिलाको ज्यान गएको उनका परिवारजनको आरोप छ । मैनालीका आफन्तजनले एम्बुलेन्स फुटाउनुका साथै अस्पतालको सेवा अवरुद्ध पारेको प्रहरीले जनाएको छ।
अहिले ज्यान गुमाएकी महिलाका आफन्तजन र अस्पताल प्रशासनबीच वार्ता भइरहेको छ। मैनालीका परिवारजनले अस्पतालसँग रु २० लाख क्षतिपूर्तिको माग राखेको बताइएको छ। रासस