जिल्ला प्रहरी कार्यालय कैलालीले गस्तीमा रहेको प्रहरी टोलीमाथि आक्रमण गरेको आरोपमा ११ जना विरुद्द ज्यान मार्ने उद्योगमा मुद्दा दायर गरेको छ।
उनीहरु सबैलाई जिल्ला अदालत कैलालीमा पेश गरेको कैलाली प्रहरी नायब उपरिक्षक विश्वराज खड्काले जानकारी दिएका छन्।
पक्राउ पर्ने सबै धनगढी नगरपालिका वडा नम्बर १० जुगेडाका बासिन्दा रहेका छन्। प्रहरीका अनुसार २२ वर्षका दयाराम राना, १८ वर्षका हरिराम राना, ३५ वर्षका हरिकिसन राना, २२ वर्षका श्याम राना, १७ वर्षका राजु रानालाई ज्यान मार्ने उद्योगमा मुद्दा दायर गरिएको छ।
त्यस्तै २४ वर्षका अम्मर राना, २४ वर्षकै शिवराज राना, २५ वर्षका जयप्रकाश राना, २४ वर्षका मनोज राना, ४० वर्षका झेली राना र ३५ वर्षका गंगा राना उपर समेत ज्यान मार्ने उद्योग अर्न्तगत मुद्दा दायर गरिएको छ।
प्रहरी नायब उपरिक्षक खड्काले ६ जनालाई अनुसन्धान पश्चात आफन्तको जिम्मा लगाएको र फरार ११ जनाको खोजी भैरहेको बताएका छन्।
प्रहरीले पूर्वयोजना अनुसार नै प्रहरी माथि सोही ठाउँको श्री गणेश ईट्टा उद्योगमा बोलाएर आक्रमण गरेको बताएको छ।
प्रहरीले चैत १२ गते घरेलु मदिरा नष्ट गरेको कुरालाई रिसिईवी लिएर ३०/३५ जनाको संख्यामा रहेका स्थानीयले आक्रमण गरेको प्रहरीको भनाई छ।
कुटपिटबाट अस्थायी प्रहरी पोष्ट जुगेडाबाट गस्ती खटिएका प्रहरी हवल्दारद्वय गणेशराज जोशी र थानेश्वर पन्त गम्भीर घाईते भएका छन्। उनीहरुसँगै रहेका प्रहरी जवानद्वय रविन्द्र नेगी र जय बहादुर साउँद भने आक्रमणबाट जोगिएको प्रहरीले बताएको छ।
घाईतेद्वयको सेती अञ्चल अस्पतालमा उपचार भैरहेको छ।
यो पनि हेर्नुहोस्
झगडा भएको खबर गरेर प्रहरीमाथि सांघातिक आक्रमण
