धनगढी नगरपालिकाको घुईयाघाटमा गएराति प्रहरीमाथि साङ्घातिक आक्रमण भएको छ।
प्रहरीलाई जुगेडाको श्रीराम ईटा भट्टामा झगडा भइरहेको खबर गरेर एक समूहले एक्कासी आक्रमण गरेको जिल्ला प्रहरी कार्यालय कैलालीले जानकारी दिएको छ।
प्रहरीका अनुसार स्थानीय राना थारु समुदायका करिब ५० जनाको समूहले आक्रमण गरेको हो। उनीहरुको आक्रमणबाट प्रहरी हबल्दारद्वय गणेशराज जोशी र थानेश्वर पन्त घाइते भएका छन्।
लाठी, ईटाले आक्रमण भएपछि घाइते दुबैको टाउको पिठ्यूँ, छातीमा गम्भिर चोट लागेको छ। दुबै जनाको सेती अञ्चल अस्पतालमा उपचार भइरहेको छ।
जिल्ला प्रहरी कार्यालय कैलालीका प्रहरी नायब उपरीक्षक विश्वराज खड्काले दिएको जानकारी अनुसार ईटा भट्टामा झगडा भएको भनेर प्रहरीलाई खबर भएको थियो।
उक्त सूचना पाएर अस्थायी प्रहरी चौकी जुगेडाबाट चार जना प्रहरी घटनास्थलतर्फ गएका थिए। प्रहरीहरु ईटा भट्टामा पुग्ने बित्तिक्कै एक्कासी ईटा र लाठीले साङ्घातिक आक्रमण भएको डिएसपी खड्काले बताए।
‘उक्त समूहले दुई जना प्रहरीलाई आक्रमण गरी त्यहिं नै घाइते बनायो', उनले भने–‘दुई जना प्रहरी भाग्न सफल भए। उनीहरुलाई सामान्य चोटपटक लागेको छ।' प्रहरी रबिन्द्र नेगी र जयबहादुर साउँद भाग्न सफल भएका थिए। आक्रमणकारीले प्रहरीको पोशाक समेत च्याती दिएको डिएसपी खड्काले जनाएका छन्।
आक्रमणको खबरपछि खटेको प्रहरी टोलीले नै घाईतेहरुको उद्धार गरेर अस्पतालमा ल्याएको प्रहरीको भनाई छ।
प्रहरीमाथि साङ्घातिक आक्रमण भएपछि तीन जना इन्सपेक्टर सहित ५० जना भन्दा बढी प्रहरी घुईयाघाट गाउँमा परिचालन गरिएको छ।
आक्रमणकारीहरु सबै राना थारु समुदायका व्यक्ति रहेको र उनीहरुको पहिचान भइसकाले सबैलाई पक्राउ गरेर कानुनी कारबाही गर्ने डिएसपी खड्काले बताए।
उनले भने–‘सबैको पहिचान भइसकेको छ। प्रहरीको एउटा टोली भारतको सीमा नाकातिर र अर्को गाउँमा परिचालन गरिएको छ। गाउँमा जति मान्छे भेटिन्छन्। सबैलाई नियन्त्रणमा लिन्छौं।'
गतवर्ष पनि उक्त गाउँमा प्रहरीमाथि त्यस्तै आक्रमण भएको प्रहरी उपरीक्षक बिक्रम बहादुर चन्दले बताए।
उनले भने–‘राना थारु समुदाय कस्तो एग्रेसिभ समुदाय हो? उनीहरुको व्यवहार बुझ्नै सकिएको छैन।'
एसपी चन्दले दोषीहरुलाई कडा कारबाही गर्ने बताए। उनले भने–‘ज्यान लिने उद्देश्यका साथ आक्रमण गरेको देखिन्छ। दोषीहरुलाई कर्तव्य ज्यान मुद्दामा समेत कारबाही हुन सक्छ।'