सरकारले मेडिकल कजेजको सम्बन्धनको दिने विषयको विरोधमा आमरण अनसनमा बसीरहेका डा गोविन्द केसीसँग वार्ता गरी समस्या समाधानको पहल गर्न शिक्षा, स्वास्थ्य मन्त्री र मुख्यसचिवलाई खटाएको छ।
शुक्रबार बसेको मन्त्रिपरिषदको बैठकले विगत ६ दिनदेखि अनसनमा बसेको केसीको अवस्था गम्भीर हुदै गएपछि उनीलाई भेटी कुराकानी र वार्ता गर्ने जिम्मा शिक्षा मन्त्री चित्रलेखा यादव र स्वास्थ्य* मन्त्री खगराज अधिकारीसँगै मुख्य सचिव लिलामणि पौडेललाई दिएको हो।
सरकारका एक मन्त्रीले दिएको जानकारी अनुसार, सरकारले मेडिकल कलेजको सम्बन्धनका विषयमा अध्ययन गरी प्रतिवेदन तयार पार्न गठित त्रिभुवन विश्वविद्यालयका पूर्व उपकुलपति केदारभक्त माथेमाको प्रतिवेदन नआउदासम्म केसीलाई अनसनमा नबस्न पनि आग्रह गरेको छ।
एमाले नेता राजेन्द्र पाण्डे लगायतका केही व्यक्तिहरुले चर्को दबाब दिएपछि सरकारले चारवटा मेडिकल कलेजलाई तत्काल सम्बन्धन दिने प्रक्रिया अघि बढाएको थियो। त्यसको विरोधमा पाँचौं पल्ट त्रिवि शिक्षण अस्पतालका डाक्टर केसी अनसनमा बसेका छन्।
केसीको स्वास्थ्य अवस्था नाजुक हुँदै गएको जानकारी चिकित्सकहरुले दिएपछि समस्या समाधानका लागि सरकारले पहल थालेको हो।
*- सच्याइएको-सम्पादक