गुटखा उद्योगी गोविन्द खतिवडामाथि भएको गोली आक्रमण घटनाका दोषी अझै फेला पर्न सकेका छैनन्। शुक्रबार सम्साँझै विराटनगर–६ चाँदनीचोक छेउमा खतिवडामाथि गोली प्रहार गरेर भागेको समूह को भन्ने प्रहरीले सुइँको पाउन सकेको छैन।
प्रहरीका अनुसार खतिवडामाथि गोली प्रहार गर्ने समूहको खोजी तीब्र भइरहेको भए पनि अहिलेसम्म पहिचान हुन सकेको छैन। ‘हामीले खोजी र अनुसन्धानलाई व्यापक बनाइरहेका छौं,' मोरङका प्रहरी प्रवक्ता डिएसपी जगन्नाथ गौतमले भने, ‘उहाँमाथि गोली प्रहार गर्ने व्यक्ति को हुन् अहिलेसम्म हामीले पत्ता लगाउन सकेका छैनौं।'
साथीभाइसँग चिया खाएर चाँदनीचोकबाट फर्किने क्रममा खतिवडामाथि गोली प्रहार भएको थियो। दाहिने हात र देब्रे खुट्टाको तिघ्रामा गोली लागेका खतिवडाको विराट नर्सिङ होममा उपचार भइरहेको छ।
राधाकृष्ण चोकछेउ पुग्दा खतिवडालाई गोली हानिएको थियो। नीलो रङको भारतीय नम्बर प्लेट भएको मोटरसाइकलमा दुईजनाले पैदल हिँडिरहेका खतिवडालाई साँझ ६:१५ बजे दुई राउन्ड फायर गरेर भागेका थिए। राधाकृष्ण चोकबाट दक्षिण त्रिमूर्ति चोक हुँदै उनीहरू फरार भएको प्रहरीको भनाइ छ।
खतिवडाका अनुसार मोटरसाइकलमा आएका दुई व्यक्ति कालो वर्णका थिए। मोटरसाइकल चलाउने व्यक्ति होचो कदका र गोली चलाउने व्यक्ति अग्लो र पातलो शारीरिक वनावटका थिए।
प्रवक्ता गौतमका अनुसार खतिवडामाथि आक्रमण गर्ने उनीहरूले सानो हतियार प्रयोग गरेका थिए। उक्त हतियारको गोली घरायसी रहेको उनको भनाइ छ। ‘खतिवडालाई मार्नेभन्दा तर्साउने उद्देश्यले गोली प्रहार गरिएको हुनसक्ने अनुमान हाम्रो छ,' उनले भने, ‘घटनामा प्रयोग भएको हतियार, गोली र गोली हनाइको प्रकृति त्यस्तै देखिन्छ।'
पीडित खतिवडाले आफूलाई मार्ने उद्देश्यले नै गोली हानेको दाबी गर्दै आएका छन्। यद्यपि, उनले आफूलाई कसले आक्रमण गर्यो भन्ने सुइँको नपाएको बताउँदै आएका छन्। ‘मसँग कसैको दुश्मनी थियो भन्ने लाग्दैन,' उनी भन्छन्, ‘कसैले धम्क्याएको पनि थिएन।'
प्रहरीले खतिवडा गोलीकाण्ड प्रकरणलाई तीन तरिकाले विश्लेषण गरेको छ।
कारण नं. १ : नक्कली ट्रेडमार्क
प्रहरीका अनुसार आन्तरिक राजश्व कार्यालय विराटनगरबाट रिटायर्ड नायब सुब्बा खतिवडा सरकारी जागिर छाडेपछि विराटनगर–५ मा गुटखा उद्योग स्थापना गरेर व्यापार गरिरहेका व्यक्ति हुन्। विराटनगरकै विशाल केमिकल्स नामक उद्योगले शिखर गुट्खा उत्पादन गर्थ्यो। उक्त उद्योग बन्द भएपछि खतिवडा शिखर गुटखाको ट्रेडमार्क चोरेर गुटखा उत्पादन गर्थे।
नक्कली ट्रेडमार्कमा गुटखा उत्पादन गरेको भन्दै आन्तरिक राजश्व कार्यालय र जिल्ला प्रशासन कार्यालयले एक वर्षअघि खतिवडाको उद्योगमा दुई पटक छापा मारेको थियो। खतिवडालाई नक्कली अन्तशुल्क स्टिकर प्रयोग गरी राजश्व छली गरेको आरोप पनि लाग्ने गरेको छ। ‘गैरकानुनी काम गर्ने गरेका कारण कसैसँग दुश्मनी भएको हुनुपर्छ भन्ने हाम्रो विश्लेषण छ,' गौतमले भने, ‘तर पीडित स्वयमले यसबारे केही नबताएका कारण अनुसन्धान सोचेजति अघि बढ्न सकेको छैन।'
कारण नं. २ : पार्टनरसिप
प्रहरीका अनुसार खतिवडामाथि गोली प्रहार गर्नुका पछाडि अर्को कारण हुनसक्छ – पार्टनरसिप। धरानमा जानकी प्रोडक्ट नामक गुटखा उद्योग खोलेका रोशन सोनी पहिले खतिवडाका व्यापारिक पार्टनर थिए। यी दुईबीच साझेदारीमा खटपट भएपछि सोनी र खतिवडा अलग भएका थिए।
खतिवडासँग अलग भएपछि धरानमा सोनीले अर्को उद्योग खोलेका हुन्। हालको प्रहरी अनुसन्धान अनुसार यी दुबैले नक्कली ट्रेडमार्क र नक्कली अन्तशुल्क स्टिकर प्रयोग गरेर राजश्व ठगी गर्ने गरेका थिए। ‘खतिवडा आफूलाई राजश्व ठगीको आरोप लाग्दा सोनीलाई देखाउँथे, सोनीलाई लाग्दा खतिवडालाई,' प्रशासनका एक अधिकारीले भन्छन्, ‘दुबैजना गैरकानुनी व्यापारमा सक्रिय रहेको पत्ता लागेको छ।'
पछिल्लो समय दुबैजना मिलेको बताइन्छ। खतिवडा आफैंले यसलाई स्वीकार गरेका छन्। खतिवडाका अनुसार सोनीसँग पुनः पार्टनरसिपका लागि सम्झौता भइसकेको थियो। ‘दुबैजनाको संयुक्त लगानीमा नयाँ गुटखा उद्योग चलाउने सहमति भएको थियो,' खतिवडा भन्छन्, ‘मेरो दुश्मनी सोनीमात्र हैन, अरु कसैसँग थियो भन्ने लाग्दैन।'
कारण नं. ३ : सताइएका व्यक्ति
प्रहरीका अनुसार खतिवडा राजश्व अनुसन्धान विभागमा रहेर कार्यरत रहँदा ‘दुनियाँ' व्यापारीलाई दुःख दिएको आरोप लाग्ने गरेको छ। मुद्दामामिला मिलाउने सन्दर्भमा खतिवडाले व्यापारीलाई आर्थिक पाटोबाट धेरै नै सताएको आरोप लागेको छ।
‘राजश्व विभागमा रहँदा खतिवडाले व्यापारिक फर्मबाट अकुत आर्जन गरेको आरोप लाग्ने गरेकाले त्यसको रिस फेर्न कसैले गोली हानेको हुनुपर्छ,' गौतम भन्छन्, ‘हामी सबैपक्ष केलाएर अनुसन्धान गर्दैछौं।'
प्रारम्भीक अनुसन्धानमा खतिवडामाथि गोली प्रहार गर्दा पेशेवर सुटर प्रयोगको छनक नदेखिएको प्रहरीको भनाइ छ। ‘खतिवडालाई मार्न खोजिएको हो भने र पेशेवर सुटर प्रयोग गरिएको थियो नत्र भने त्यसले हात र खुट्टामा गोली हान्दैनथ्यो,' गौतम भन्छन्, ‘कसैले हाइयर गरेर पठाएको भन्ने कुरामा शंका छैन, तर पेशेवर सुटर भने होइन।'
खतिवडामाथि गोली आक्रमणमा अर्को कारण चन्दा हुनुपर्ने प्रहरीको भनाइ छ। चन्दामा कुरा नमिलेपछि गोली हानेको हुनसक्ने आशंका गरिएको छ। तर खतिवडाले आफूसँग कसैले चन्दाको कुरा नगरेको बताउने गरेका छन्।
विराट नर्सिङ होममा उपचाररत खतिवडा। तस्बिर : खिलानाथ/सेतोपाटी