बाढी र डुबानको उच्च जोखिममा रहेका बाँके र बर्दियाका बिभिन्न बस्तीहरुमा बिपद मैत्री खानेपानीका धारा निर्माण सुरू गरिएको छ।
बाढी र डुबानका कारण खानेपानी प्रदुषित हुने र बाढी प्रभाबितहरु त्यहि प्रदुषित खानेपानी खादा बिरामी हुने समस्या बढ्दै गए पछि जिल्ला बिपद ब्यवस्थापन समितिसँग समन्बय गरेर बिपद प्रतिकार्य क्षेत्रका क्रियाशिल संघ संस्थाहरुको सहयोगमा खानेपानीका धाराहरु निर्माण गर्न सुरू गरिएको हो।
बाँके र बर्दियाका बाढी प्रभाबित क्षेत्रमा केयर नेपाल ,सेभ दि चिल्डेन र अक्सफामले बिपद मैत्री ८ वटा धाराहरु निर्माण गरेका छन्।
खानेपानीका धाराहरुमा बाढी तथा डुबान बेला पानी पसेर प्रदुषित हुन नपाओस भनेर बाढीको बेला आएको पानीको सहतभन्दा अग्लो संरचना निर्माण गरी धाराहरु निर्माण गरिएको अक्सफामका नेपालगन्जस्थित आपतकालिन प्रतिकार्य संयोजक बिजय पन्तले बताए।
अन्य धारा भन्दा फरक बिपद मैत्री धारा निर्माणमा बढी खर्च लाग्ने भए पनि बिपदका बेला ती धारा धेरै उपयोगी हुने देखिएको छ। जमिनको सहत भन्दा तीनदेखि चार फिट अग्लो संरचना बनाएर धारा निर्माण गर्दा करिब ६५ हजार खर्च लाग्ने पन्तले बताए।
विपद मैत्री धाराहरु गाउलेहरुलाई पायक पर्ने स्थानमा निर्माण गरिएको र बाढीका बेला धेरै काम लाग्ने बाके कचनापुरकी आमरानी थारुले बताइन्।
बाढी र डुबानका कारण क्षतिग्रस्त भएका धाराहरुको मर्मत तथा नया धारा निर्माण गर्दा बिपद मैत्री हिसाबले निर्माण गर्न सकिए बिपदका बेला खानेपानी प्रदुषित भएर हुने रोगको महामारीलाई नियन्त्रण गर्न सहज हुने गृहमन्त्रालय बिपद ब्यबस्थापन माहशाखाका अधिकृत बंशी आचार्यले बताए।
साउन महिनाको अन्तिम साता आएको बाढी तथा पहिरोबाट बाके, बर्दिया र सुर्खेतका ३१ हजार ५ सय परिबार प्रभाबित भएका थिए।
