ट्युसन पढन गएका बेला एसिड प्रहारबाट गम्भीर घाईते भएकी संगीता मगरलाई काठमाडौं इन्जिनियरिङ कलेजका विद्यार्थीहरूले आर्थिक सहयोग गरेका छन्।
काठमाडौँको बसन्तपुरस्थित ए-प्लस टिउसन सेन्टरमा पढ्दै गर्दा विद्यार्थीहरू सीमा बस्नेत र संगीता मगरमाथि एसिड प्रहार गरेको घटना प्रति दुःख व्यक्त गर्दै विद्यार्थीहरूले १५ हजार रूपैयाँ सहयोग गरेका हुन्।
काठमाडौँ इन्जिनियरिंग कलेजको सामाजिक क्लब ‘हेल्पिङ ह्याण्ड एन इफोर्ट टु लिफ्ट पिपलले कलेज प्रशासन, शिक्षक तथा विद्यार्थीहरुको संयुक्त सहयोगबाट संकलित रकमलाई बिहीबार पीडित परिवारलाई हस्तान्तरण गरेको हो।
पीडित विद्यार्थीको उपचारमा केही हदसम्म भएपनि सहयोग होस् भनेर सहयोग गरिएको विद्यार्थीहरूले जनाएका छन्। अस्पतालमा घाइते विद्यार्थीलाई रकम हस्तान्तरण गर्दै विद्यार्थीहरूले यस्तो निन्दनीय घटनाप्रति भत्सर्ना गर्दै भविस्यमा यस्तो घटना अब नदोहोरियोस भनेका छन्।
