ट्युसन पढन गएका बेला एसिड प्रहार गरिएपछि गम्भीर घाईते भएका दुई किशोरीहरुको उपचारको लागि नेत्रविक्रम चन्द नेतृत्वको नेकपा माओवादी निकट अखिल क्रान्तिकारीले आर्थिक सहयोग गरेको छ।
बिहीबार रिपोर्टर्स क्लब नेपालको संयोजनमा अखिल क्रान्तिकारीले आयोजना गरेको कार्यक्रममा संगठनले संकलन गरेको १ लाख १० हजार रुपैया घाईतेका परिवारजनलाई हस्तान्तरण गरेको छ।
संकलित रकम मध्ये ६० हजार रुपैयाँ संगिता मगरको परिवार र ५० हजार रुपैया सीमा बस्नेतको परिवारलाई अध्यक्ष सरद रसाईलीले हस्तान्तरण गरेका थिए।
हस्तान्तरण कार्यक्रममा अध्यक्ष रसाईलीले घटना घटेको चार दिन वितिसक्दा समेत राजधानीबाट अपराधी पक्राउ पर्न नसक्नु राज्यको गम्भीर उदासिनता भएको आरोप लगाउँदै भविष्यमा यस्ता घटना घटन नदिन राज्यले तत्काल उनीहरुलाई पक्राउ गरे कारवाही सुरु गरी शान्ति सुरक्षाको प्रत्याभुत गर्नु पर्ने माग गरे।
उनले घाईते किशोरीहरुको निःशुल्क उपचार र भरण पोषणको ब्यवस्था राज्यले मिलाउनु पर्ने माग गर्दै अपराधीहरुमाथि तत्काल कारवाही नभए आफूहरु अझै कडा संघर्षमा जान बाध्य हुने चेतावनी दिए।