नेपाली काँग्रेसका नेता अमरेश कुमार सिहंले दोस्रो संविधान सभा पनि विफल भए देश गृहयुद्धमा जाने बताएका छन्।
रफत सञ्चार क्लव भक्तपुरले सोमबार गरेको अर्न्तसंवाद कार्यक्रममा बोल्दै प्रक्रियाबाट नभई सहमतीबाट संविधान जारी गर्न नसके आन्दोलनको स्वरुप परिवर्तन हुँदै देश गृह युद्दमा जाने उनले बताए।
उनले भने, 'यदि मोर्चालाई बेलैमा सहमतीमा ल्याउन नसके त्यसको असर सिधै सरकारमा पर्ने र बैशाखको अन्त्यसम्म सरकार परिवर्तन हुने छ।' २०६२, २०६३ को अन्दोलनकारी शक्तिहरुको सहमतिमा संविधान जारी गर्न नसके देश लामो समयसम्म द्वन्द्वमा जाने सिंहको टिप्पणी थियो।
राजनीतिक दलका शीर्ष नेताहरुबीचको तिक्तताले सहमतीको वाताबरण बन्न सकेको छैन भने अर्को तर्फ तराईको मागलाई सम्बोधन गर्न बेलैमा चुके अन्दोलनको आगो बल्ने छ र त्यसको प्रत्यक्ष असर केन्द्रमा पुग्ने निश्चित देखिने दाबी सिंहको थियो।
संघीयताको विषयमा जसरी तराईका पाँच जिल्लालाई बार्गेनिङ पोइन्ट गराईदैछ र पहिचानको मुद्दाका विषयमा बुझाउन सकिएको छैन यसले झनै जटिलता थप्दै गएकाले राजनीतिक समिकरण र धुब्रिकरण देखा परेको सिंहले बताए।
लामो समयसम्म सरकारले ग्यासको हाहाकारलाई सम्बोधन गर्न नसक्नु र देशमा मौलाउँदै भ्रष्टाचार नियन्त्रण हुन नसक्नु जस्ता रोगले मोर्चाको अन्दोलनलाई सहयोग पुग्ने उनको भनाई थियो। अन्दोलनलाई नेपालका सत्ता पक्षकै नेताहरुबाट समेट व्यक्तिगत प्रतिस्पर्धाले सहयोग गर्ने उनको भनाई थियो।
