इस्लामिक बिद्रोही समूह आईएसले आफ्नो कब्जामा रहेका अर्का जापानी नागरिक केजी गोतोको शिर काटेर हत्या गरेको भिडियो सार्वजनिक गरेको छ।
गत साता आफ्नो कब्जामा रहेका जापानी नागरिक हारुना युकावाको शिर छेद्न गरी हत्या गरेको केही दिनमा गोतोको हत्या गरेको खुलासा भएको अन्तर्राष्ट्रिय सञ्चारमाध्यमहरूले जनाएका छन्।
पेशाले पत्रकार समेत रहेका गोतोको रिहाइका लागि जापान सरकारले गरेको प्रयासलाई चुनौती दिँदै आईएसले उनको हत्या गरेको हो।
यसअघि इस्लामिक लडाकु समूह आईएसले फिरौती रकम नदिए आफ्नो कब्जामा रहेका दुई जापानी नागरिकलाई मार्ने धम्की दिएको थियो।
मुकुण्डो लगाएका आईएस लडाकुले भिडियो मार्फत ७२ घण्टाभित्र २० करोड अमेरिकी डलर नदिए कब्जामा रहेका दुई जापानीको हत्या गर्ने धम्की दिएको वीवीसीले जनाएको छ।
इस्लामीक राज्यको माग गर्दै सशस्त्र संघर्ष गरिरहेको आईएसले पूर्वी सिरिया, उत्तर र दक्षिणी इराकको ठूलो भूभाग आफ्नो नियन्त्रणमा लिएका छन् ।