पर्साको क्षेत्र नं. ३ अन्तर्गत गाविस हरपुर वडा नं. ८ बडेरवामा बुधवार प्रहरीले गरेको कारबाहीप्रति मधेसी जनअधिकार फोरम नेपाल पर्साको गम्भीर ध्यानाकर्षण भएको जनाइएको छ।
कार्यवाहक जिल्ला अध्यक्ष मन्जुर अन्सारीको नेतृत्वमा ७ सदस्यीय टोली घटनास्थल पुगि प्रहरीको गोली प्रहारबाट घाइते परिवारलाई नगदसहित फलफूल वितरण गरेको छ। केन्द्रीय अनुसन्धान ब्युरो सिआईबीले अपराधी पक्राउ गर्ने बाहानामा स्थानीयलाई आतंकीत गरेको भन्दै प्रहरीको रवैयालाई फोरम नेपालका नेताहरुले भर्त्सना गर्दै न्यायीक छानविनका माग गरेका छन्।
हरपुरमा भएको अमानवीय घटनाको बारेमा छानबीनका लागि उच्चस्तरीय न्यायीक छानबीन समिति गठन गर्नुको साथै दोषी प्रहरीलाई तत्काल कारबाही गर्नुपर्ने र पीडितहरुलाई उचित क्षतिपूर्ति दिनको लागि सम्बन्धित निकायसँग माग गरेको छ।
प्रहरीले बदनियतिपूर्ण ढंगले छापामारेको फोरम नेपालले आरोप छ। पर्सा प्रहरी र सिआइबिको संयुक्त टोलीले गैर न्यायीक ढंगले ७० राउण्ड गोली प्रहार गर्नुको साथै घर घरमा प्रवेश गरेर बालबालिका, महिला तथा वृद्ध वृद्धा समेतलाई निर्घात कुटपिट गरि घाइते बनाएको फोरम नेपालको ठहर रहेको छ।
केन्द्रीय सदस्य एवं पूर्व राज्यमन्त्री करिमा बेगम, केन्द्रीय सदस्य वीरेन्द्र यादव, जिल्ला नेता हजारीप्रसाद साह, उमेश लाल सहनी, कामेश पण्डित, उमाशंकर कर्ण, महिला नेतृ राधिका देवी लगायतले हरपुरमा शनिबार दिउँसो पीडित परिवारसँग भेट गरेका छन्।