उत्तरपूर्वी अमेरिकाका केही राज्यमा सोमबार साँझबाट तिब्र गतिको हिमआँधी जुनोको प्रभाव अझै जारी छ। न्यूयोर्क, न्यूजर्सी, कनेक्टिकट, रोड आइल्याण्ड, पेन्सिलभेनिया,
बोस्टन र न्यु ह्याम्सायर हिमआँधीको प्रभावमा परेका छन्।
मौसमविद्ले दिएको चेतावनीअनुसार तुलनात्मक रुपमा न्यूयोर्क र न्यूजर्सीभन्दा बोस्टन र न्युह्याम्सायर हिमआँधीको बढी प्रभाव परेको छ। न्यूयोर्क सहरमा मंगलबारबाट आँधी कमजोर हुँदै गएको छ भने बोस्टन आसपास क्षेत्रमा आँधीको गति तिब्र बन्दै गएको मौसमविद्ले जानकारी दिएका छन्।
रातभरको हिमपात र आँधीले यी राज्यमा मंगलबार बिहानको दृश्यमा पुरै बदलाव आएको छ। हिउँले पुरै क्षेत्र ढाकिएर सेताम्य बनाएको छ।
ती राज्यमा उच्चसतर्कता अपनाउँदै सोमबारटै संकटकाल घोषणा गरिएको छ। मंगलबार बिहान पनि मानिसहरु बाहिर निस्कन सकेका छैनन्। राज्यले अत्यावश्यकीय सेवा बाहेकका सवारी साधन सञ्चालनमा रोक लगाएको छ। जसका कारण राजमार्ग र अन्य सडक सुनसान छन्।
सडकमा हिउँ जम्न नदिन सयौं साधनलाई चौविसै घण्टा परिचालन गरिएको छ। बोस्टन सहरमा हिउँ सफा गर्न ४ हजारभन्दा बढी व्यक्तिलाई सडकमा उतारिएको छ। यस्तै हिउँ पगाल्न २ लाख ५० हजार टन नून र ४ लाख २० हजार ग्यालेन केमिकल खर्च गरिएको स्थानीय गभर्नरले जानकारी दिएका छन्।
मंगलबार राजमार्ग, भित्री सडक, रेल सेवा, विमानस्थल, साना ठूला बजार, विद्यालय, कलकारखाना, सरकारी तथा नीजि कार्यालय बन्द गरिएका छन्। जुनो हिमआँधीका कारण सोमबारबाट घोषित संकटकाल न्यूयोर्कमा मंगलबार बिहानबाट फिर्ता लिए पनि अन्य राज्यमा यथावत छ। जसका कारण राजमार्गहरु सुनसान बनेका छन् भने सोमबार र मंगलबारका हजारौं हवाई उडान रद्ध भएका छन्।
मौसमविद्ले दिएको चेतावनीका बाबजुद न्यूयोर्क र न्यूजर्सीमा हिमआँधीको प्रभाव मंगलबार बिहानबाट कम परेको त्यहाँका गभर्नरले जानकारी दिएका छन्। हिमआँधीको प्रभाव सोचेभन्दा कम देखिएपछि सोमबारबाट लागू संकटकाल मंगलबार बिहान फिर्ता लिएको हो।
सोमबार मध्यरातबाट बन्द गरिएका न्यूयोर्क सार्वजनिक बस र रेल सेवा मंगलबार बिहानबाट सिमित मात्रामा सञ्चालनमा आएको छ। त्यहाँ अहिलेसम्मकै ठूलो हिमपात हुने चेतावनी दिइएको थियो। न्यूयोर्कमा तीन फिटसम्म हिउँ परेको छ।
अमेरिकी मौसम पूर्वानुमान विभागकाअनुसार कनेक्टिकट, पेन्सिलभेनिया र बोस्टन राज्यमा भने मंगलबार बिहान पनि प्रतिघण्टा ४० माइलभन्दा तिब्र गतिमा हिमआँधी चलिरहेको छ। यो क्रम मंगलबार दिनभर र मध्यरातसम्म जारी रहने मौसमविद्ले जनाएका छन्।
न्यूयोर्क सहरमा बिहानबाट आँधीको गति ८ प्रतिघण्टा ४० माइलमा झरेको छ। सोमबार मध्यरातबाट आँधीको गति न्यूयोर्कलगायत राज्यमा प्रतिघण्टा ७८ माइलसम्म पुगेको थियो।
विभिन्न राज्यका गभर्नरले सर्वसाधारणलाई सुरक्षित स्थानमा रहन र सतकर्ता अपनाउन सार्वजनिक अपिल गरेबमोजिम मानिसहरु पर्याप्त खानेकुरा जोहो गरेर घरमै बसेका छन्। बोस्टनका केही स्थानमा बिजुली र पानी आपूर्ति बन्द भएपछि स्थिति जटिल बनेको स्थानीय सञ्चारमाध्यमले जनाएका छन्।