नेपाल कुष्ठरोग निवारण संघ कैलालीले ६२ औं विश्व कुष्ठरोग दिवसको अवसरमा कुष्ठ प्रभावितलाई कम्बल वितरण गरेको छ।
धनगढीमा आज आयोजित एक समारोहमा विभिन्न २० जना कुष्ठ प्रभावितहरुलाई कम्बल वितरण गरिएको छ। संघले सेती अञ्चल अस्पतालमा रहेको क्षेत्रीय कुष्ठरोग प्रेषण केन्द्रमा रहेका कुष्ठ प्रभावित व्यक्तिहरुलाई कम्बल वितरण गरिएको अध्यक्ष सीताराम जोशीले जानकारी दिएका छन्।
उनले केन्द्रमा रहेका कुष्ठ प्रभावित व्यक्तिहरु जाडोयामका कारण समस्यामा रहेको जानकारीमा आएपछि राहत स्वरुप कम्बल वितरण गरिएको बताए।
कम्बल वितरण कार्यक्रममा बोल्दै सेती अञ्चल अस्पतालका मेडिकल सुपरिटेण्डेन्ट डाक्टर गणेशबहादुर सिँहले औषधी सेवन पछि निको भैसकेका कुष्ठ प्रभावित व्यक्तिहरुलाई गाउँमा फर्किएर सकारात्मक सन्देश फैलाउन आग्रह गरेका छन्।
उनले अझै पनि समाजमा कुष्ठरोग प्रति नकारात्मक धारणा रहेको भन्दै निको भएका कुष्ठ प्रभावित व्यक्तिहरुको सन्देशले मात्रै जनचेतनामा परिवर्तन आउने बताएका छन्।
कैलाली कुष्ठरोग उच्च प्रभावित देशभरका १६ जिल्ला मध्येको एक हो। यहाँ चालु आर्थिक वर्षको चार महिनामा मात्रै ५२ जना कुष्ठ प्रभावित व्यक्ति भेटिएका छन्।
जिल्ला जनस्वास्थ्य कार्यालय कैलालीका अनुसार हाल १ सय २४ जना कुष्ठ प्रभावितले नियमित औषधी सेवन गरिरहेका छन्। गत आर्थिक वर्षमा कैलालीमा १ सय ६ जना कुष्ठ प्रभावित व्यक्ति थिए। जसमध्ये ३४ जना उपचार पछि निको भएर गएको र २ जना सम्पर्क विहिन भएका छन्।
सन् २०१० मा कुष्ठरोग निवारण भएको घोषणा भएपनि कैलालीका फूलबारी र धनसिँहपुर गाविसमा प्रति दश हजारमा ४ जना भन्दा धेरै र दरख गाविसमा ३ देखि ४ जना कुष्ठ प्रभावित भएको पाईएको छ।
त्यसैगरी प्रति दश हजारमा ७ गाविसमा २ देखि ३, १३ गाविसमा १ देखि २ र ९ गाविसमा १ भन्दा कम व्यक्ति भेटिएका छन्। जिल्ला जनस्वास्थ्य कार्यालय कैलालीका क्षय/कुष्ठ अधिकृत विनोद कर्णले १२ गाविसमा कुष्ठ प्रभावित व्यक्ति प्रति दश हजारमा शुन्य रहेको छ।
कैलालीमा आर्थिक वर्ष २०७०/०७१ मा कुष्ठ प्रभावित व्यक्तिहरुको संख्या प्रति दश हजारमा २ दशमलव १ रहेको छ। अघिल्लो आर्थिक वर्ष २०६९/०७० मा भने यो संख्या १ दशमलव ९ रहेको थियो।
सुदूरपश्चिमका नौ जिल्लामा भने आर्थिक वर्ष २०७०/०७१ मा २ सय ९१ जना कुष्ठ प्रभावित व्यक्ति फेला परेका छन्। जसमध्ये १ सय ९३ जना अहिले नियमित औषधी सेवन गरिरहेको नेदरल्याण्ड लेप्रोसी रिलिफ –एनएलआर) ले जानकारी दिएको छ।
एनएलआरका अनुसार जसमध्ये ६ दशमलव ३३ प्रतिशत बालबालिका र ३ दशमलव ३८ प्रतिशत अंगभंग भएका व्यक्ति रहेका छन्।