विद्यालयका प्रधानाध्यापकलाई गिफ्टको प्याकेटमा सकेट बम र धम्कीपुर्ण चिठी पठाउने व्यक्तिलाई प्रहरीले नियन्त्रणमा लिएको छ। जनकपुर नगरपालिका १ स्थित मदर टेरेसा पब्लिक हाई स्कुलका प्रधानाध्यापक गोविन्द चन्द्रलाई गिफ्टको प्याकेटमा सकेट बम र धम्कीपुर्ण चिठि पठाएको घटनामा संलग्न चारजनालाई प्रहरीले पक्राउ गरेको हो।
पक्राउ परेकालाई शुक्रबार जिल्ला प्रहरी कार्यालय धनुषामा पत्रकार सम्मेलनको आयोजना गरी प्रहरीले सार्वजनिक गरेको हो। चन्द्रलाई भारतीय फोनबाट चन्दा मांग्दै पटक पटक फोन गरि ज्यान मार्ने धम्की समेत दिएको र सोही क्रममा अषाढ ११ गते विद्यालयमै एक १० वर्षिय बालकलाई गिफ्टको प्याकेट र चिठि हातमा दिई प्रिन्सीपल सरलाई दिनु भनि पठाएपछि चन्द्रले प्रहरीलाई जानकारी गराएका थिए। प्रहरीले अनुसन्धान गर्दा सो गिफ्टको प्याकेटमा सकेट बम फेला पारेको थियो।
पक्राउ पर्नेहरुमा जिल्लाको सबैला गाविस ९ निवासी ३२ वर्षिय जिवछ यादव, गाविस चोराकोयलपुर २ निवासी १९ वर्षिय विजय कुमार यादव, चक्कर २ निवासी २७ वर्षिय ईसराईल मन्सुर र रघुनाथपुर २ निवासी प्रमोद कापड रहेको प्रहरीले जनाएको छ। यी सबै अभियुक्तहरुलाई प्रहरीले विहिबार जिल्लाको विभिन्न स्थानबाट पक्राउ गरेको जनाएको छ। पक्राउ परेकाहरु मध्ये प्रमोद कापड वि.स.२०६५ सालमा रघुनाथपुर २ निवासी नागेन्द्र यादवलाई गोली हानी हत्या गरि फरार रहेको र सिरहा जिल्लाको अपहरण मुद्धामा समेत संलग्न रहेको जनाईएको छ।
कापडलाई अपहरण मुद्दा लागि भारतमा पक्राउ गरी ३ वर्ष जेल सजाय सम्म भोगेका प्रहरीले जनाएको छ। पक्राउ परेकाहरुको साथबाट प्रहरीले एकथान कटुवा पेस्तोल , सकेट बम एकथान, सिम सहितको मोबाईल ४ थान, बा.५१ प.५४२९ नं. को मोटरसाईकल, सिद्धार्थ बैंकको भिसा कार्डहरु लगायत अन्य कागजात तथा सामानहरु समेत बरामद गरेको हो। पक्राउ परेका अभियुक्तहरु माथि मुद्दा चलाई अनुसन्धान अगाडी बढाईएको प्रहरी उपरिक्षक पन्तले बताएका छन्।