विराटनगरको फाष्ट सेक्युरिटी सर्भिस (नेपाल) प्राइभेट लिमिटेडले तालिम गराउने नाममा ठगी धन्दा चलाउने गरेको खुलासा भएको छ।
रोजगारी दिने भन्दै तालिम गराउँदै एकव्यक्ति बराबर ५ हजार २ सय रुपैया असुल्ने गरेको पाइएको हो। फाष्टले धरान क्षेत्रमा रोजगारी दिने भन्दै १ सय ५० जनालाई विराटनगर लगेर १५ दिने तालिम दिँदै ५ हजार २ सय रुपैया असुलेको थियो। ती मध्ये केहीलाई रोजगार दिए पनि हालसम्म तलव नदिएको पाइएपछि रोजगारको नाममा ठगी धन्दा चलाएको खुलेको हो।
धरान १५ का राजबहादुर गुरुङ (आरवि) ले उक्त कम्पनी सञ्चालनमा ल्याएका हुन्। गत असार २० गतेबाट सञ्चलानमा ल्याएको उक्त कम्पनीले १ सय ५० जनाबाट ५ हजार २ सयका दरले ७ लाख ८० हजार रुपैया संकलन गरी फरार भएको हो। हाल कम्पनीको केन्द्रीय कार्यालय विराटनगरमा राखेको बुझिएको छ।
कम्पनीमा तालिमपश्चात असोज १२ गतेबाट कार्यरत झण्डै १ सय ५० कर्मचारीलाई तलवसमेत नदिएपछि उनीहरुले इलाका प्रहरी कार्यालय धरानमा ठगीमा निवेदन हालेका छन्। तालिममा लिएको पैसाबाट कसैलाई परिचय पत्र भने कसैलाई पैसा लिएको रिसिभ मात्रै प्रदान गरेको छ।
अहिले भर्ती भएका कर्मचारीहरु धरानको विजयपुर हस्पिटल प्रालिमा कार्यरत छन्। तर, तलव नपाएपछि आक्रोसित कर्मचारीहरुले तालिमको नाममा पैसा संकलन गरेको आरोप लगाउन थालेका छन्।
विराटनगर काम दिन्छु भन्दै लगे पनि आफूहरुलाई सुत्नेलगायत खानेको पनि राम्रो व्यवस्था नभएको भुइमा सुत्नु पर्ने र डढेको चामल खुवाउने गरेको पीडित सरोज बिकले बताए। 'तालिम दिएर रकम असुल्ने नियत देखियो।, उनले भने।
तालिम गर्न भनेर लगेको ५२ सयसँगै २ महिना १० दिन छोरा प्रविण मगरले काम गरेको पैसा दिनु पर्ने धरान १५ की सुकमाया मगरले बताइन्। पीडित कमला गौतमले पनि आफूहरुलाई ठगेको बताइन्। 'पौसा कमाउने पोलेसी जस्तै लागिरहेको छ।, उनले भनिन् 'जागिर दिन्छु भन्छ त्यो पनि फिक्स छैन्, तालिम गरेर पैसा मात्रै कुम्ल्यायो।
अहिले सञ्चालक डाइरेक्टर फरार झै छन्। उनको एनसेल, एनटिसी र ल्याण्डलाइनमा फोन लाग्दैन्। तलवसँगै तालिमको नाममा लिएको ५ हजार २ सय पनि फिर्ता नपाउने हो कि भन्ने चिन्तामा अधिकांस छन्।
कम्पनीमा कायरत तालिम संयोजक भिम नेपालीले हरेक महिनाको १० गतेसम्म तलव दिइसक्ने बताए। उनले पनि डाइरेक्टर गुरुग बारे जानकारी नभएको बताए।
धरानका शाखा व्यवस्थापक मोहन बस्नेतलाई नेपालीले फोनबाट पुष २० गतेसम्म दिइसक्ने बताएको र त्यतिञ्जेल पनि रकम नदिए जे गर्दा पनि हुन्छ भन्दै भनेको बताए। उनलेसमेत हालसम्मको तलव प्राप्त गरेका छैनन्। उनले पनि आफू पीडित भएकाले कानुन सम्मत तरिकाले कारबाही गर्ने बताएका छन्।
