सिन्धुपाल्चोकको बराम्चीस्थित बालुवामा कात्तिकेका लागि जाँदै गरेको यात्रुबाहक बसमा करेन्ट लाग्दा ४ जनाको घटनास्थलमै मृत्यु भएको छ । दस जनाभन्दा बढी घाइते भएका छन् । घाइतेमध्ये एकको अवस्था गम्भीर छ । छतबाट ज्यान बचाउन हाम फाल्ने क्रममा उनीहरु घाइते भएका हुन् । उनीहरुको प्राथमिक स्वास्थ्य केन्द्र जलवीरमा उपचार भइरहेको छ ।
मृत्यु हुनेहरुमा गोल्चे–४ का ४५ वर्षिय रेखबहादुर स्याङ्बो, पाङताङ–८की ४७ वर्षिया सर्किनी भनिने सविनी स्याङ्बो, गुम्बा–६ का ४३ वर्षिय कामी तामाङ र बतासे–३ की बाटे भनिने ४० वर्षिया मनमाया भुजेल रहेको प्रहरीले जनाएको छ ।
काठमाडौंबाट पाङताङ गाविसको कात्तिके जाँदै गरेको बा २ ख २७०२ नम्बरको सुपर एक्सप्रेसको छतमा यात्रा गरिरहेकालाई विजुलीको तारले छुँदा बसमा करेन्ट लागेको हो । बराम्ची गाविस कार्यालयका सहायक रामचन्द्र घिमिरेकाअनुसार बसको छत र भित्रसमेत यात्रु खचाखच भरिएको थिए । मृत्यु हुनेहरुको शरिर करेन्टले जलेर पूरै कालो भएको छ । घाइतेहरुको पनि अनुहार, पेट, जिउलगायत विभिन्न अंग डढेको सिन्धुपाल्चोकका प्रहरी नायब उपरीक्षक दीपकराज खरेलले जानकारी दिए ।
घटनापछि बसका चालक र सहचालक फरार छन् । करेन्ट लागेर मानवीय क्षति भएपनि बसमा कुनै क्षति नपुगेको प्रहरीको भनाई छ ।
