गत नोभेम्बर ३० मा हृदयघात भइ लन्डनको सेन्ट थोमस हस्पिटलमा उपचारका क्रममा मृत्यु भएका ३४ वर्षीय नेपाली युवक अनिल जंग थापाको शवलाई आगामी साता अन्त्यष्टीको लागि नेपाल पठाइने भएको छ। नेपालमा परिवारजनको चाहना अनुरुप उनको मृत शरीर नेपाल पठाउन लागिएको हो। "अनिलले मृत्यु हुनु पूर्व नेपाल जाने कुरा गरिरहेकोले पनि उसको आत्माले शान्ति पाउला भनेर नेपालमै अन्त्यष्टी गर्ने निधो भएको हो", लन्डनमा पारिवारिक सहयोगकर्ता रहेका भरत थापाले बताए। स्वस्थ्य जीवनशैलीमा रहने अनिलको छाती दुखेर अस्पताल पुगेपछि उपचार गर्दा गर्दै मृत्यु भएको थियो। पाँच वर्ष पहिले बेलायत आएका अनिल आफ्नी श्रीमतीको साथमा लन्डनको प्लम्स्टिडमा बस्दै आएका थिए।
नेपालको गुल्मी स्थाई घर भएका अनिलको शब नेपाल पठाउन यहाँस्थित जिल्लासँग सम्बन्धित संस्था गुल्मी जिल्ला समाज युकेको समन्वयमा बिभिन्न संघ संस्था तथा व्यक्ति हरुले प्रयाप्त आर्थिक सहयोग गरेका छन्।गुल्मी जिल्ला समाज युकेका अध्यक्ष अर्जुन गौतम सहितको टोली आज स्वर्गीय थापाको लन्डनस्थित निवासमा पुगेर सहयोग हस्तान्तरण गरेको थियो।
उपचाररत अवस्थामा भएको मृत्युको कारण प्रारम्भिक परीक्षणबाट खुल्न नसके पछि थप परीक्षणको लागि ल्याबमा पठाएसँगै पोस्ट मार्टम प्रकृया लम्बिदा नेपाल पठाउन ढिलाई भएको बताईएको छ।
राति सामान्य रुपमै घरमा सुतेका उनलाई बिहान दुई बजेतिर सामान्य छाती दुख्ने र खोकी लाग्ने भएको थियो। त्यसको केहि समयपछि नै सवा दुई बजे आफना दुई साथीहरुका साथ उनी घरनजिकैको क्वीन एलिजावेथ अस्पताल पुगेका थिए। अस्पतालको इमर्जेन्सीमा भर्ना भएर चेकअप गराइरहँदासमेत थापा सामान्य अवस्थामा जस्तै साथीहरुसँग बोलचाल गरीरहेका थिए। तर पछि रक्त परीक्षण गरीसकेपछि डाक्टरहरुले बेडमा राखेर थप उपचार गर्ने क्रममा थापा अचानक बेहोस भएका थिए।
त्यसपछि बिहान करिब पाँच बजे डाक्टरहरुको एक टोलीसहित एम्बुलेन्समा राखेर उनलाई सेन्ट थोमस अस्पताल पुरयाइएको थियो । त्यहाँ गरिएको उनको मुटुको शल्यक्रिया सफल भएपनि पछि फेरि मुटुले काम गर्न छोडेपछि बिहान ६ बजे अस्पतालले उनलाई मृत घोषित गरेको थियो।
