लेखनाथ नगरपालिका र पोखरा उपत्यका नगरविकास समितिले लेखनाथको तालचोक देखी बेगनासताल सडक खण्डमा मापदण्ड विपरित बनेका संरचना हटाएको छ। मापदण्ड विपरित बनेका संरचना हटाउन नगरपालिका र उपत्यका नगरविकास समितिले विभिन्न समयमा सूचना जारी गरेपनि अटेर गरेपछि शुक्रबार डोजर प्रयोग गरी संरचना हटाइएको हो। राजनीतिक दवावका बाबजुद ठुलो संख्यामा सुरक्षाकर्मी परिचालन गरी संरचना हटाइएको हो।
तालचोेकदेखि बेगनासतालसम्मको साढे ३ किलोमिटर सडक खण्डमा झण्डै ५० घर टहरा दुईवटा डोजर प्रयोग गरी हटाइएको हो। सो सडक खण्डमा सडकको विचभागबाट दाँया बायाँ १५ मिटर मापदण्ड तोकिएको छ। मापदण्ड विपरीतका करिब ६० वटा घरका गेट, रेलिङ, कम्पाउन्ड हटाएको पोखरा उपत्यका नगरविकास समितिका अध्यक्ष विष्णुप्रसाद बास्तोलाले बताए। उनले लेखनाथबाट शुरु भएको अभियान पोखरा सम्मपुग्ने बताए।
४० वर्ष पहिलेबाट हटाउने भनिए पनि सवैतिरबाट दवाव आउँदा व्याक हुनुपर्ने हो कि भन्ने सम्मको स्थिति आएको लेखनाथ नगरपालिकाका कार्यकारी अधिकृत रामचन्द्र पौडेलले बताए। उनले मापदण्ड विपरितकका संरचना हटाएपछि सडकलाई क्रमश विकास गर्दै जाने बताए। सडक मापदण्ड विपरित बनेका घर टहरा नभत्काउन कार्यकारी पौडेललाई स्वास्थ्य तथा जनसंख्या मन्त्री खगराज अधिकारीले ठूलो दवाव दिएका थिए। तालचोबाट डोजर लगाउन शुरु गरेपछि कतिपय नगबासीले स्वतस्फूर्त रुपमा मापदण्ड विपरित बनेका संरचना हटाएका थिए।
सडक मापदण्ड क्लियर गरेपछि सो सडकलाई फोर ल्याण्डको बनाउनका लागि पहल गरिने जनाइएको छ। गतवर्ष साइड क्लियर नहुँदा विश्व वैंकको ऋण सहयोग अर्न्तगत फास्ट ट्रयाकका रुपमा निर्माण गर्नका लागि अघि वढाइएको १९ करोडको परियोजना फिर्ता भएको थियो।
