श्रीमानको कुटाइबाट खुट्टा भाँचिएर उपचाररत पार्वती।तस्बिरः खिलानाथ ढकाल/सेतोपाटी
मोरङ गोविन्दपुर–७ की पार्वती सहनी अहिले कोसी अञ्चल अस्पतालको हाडजोर्नी विभागमा उपचाररत छिन्। भाँचिएको तिघ्रामा बुधबार स्टिल हालेर अप्रेसन गरिसकिएको छ।
अस्पतालका अनुसार तिघ्राको हड्डी नराम्ररी भाँचिएकाले अप्रेसन गर्नुपरेको हो। डाक्टरले अब केही समयका लागि हिँड्न नसक्ने बताएका छन्।
अवस्था हेरेर केही दिनमा डिस्चार्ज गरिदिने अस्पतालको योजना छ।
त्यसपछि पार्वतीले वैशाखीको मद्दत लिनुपर्छ।
...
१८ वर्षीया पार्वतीलाई ठमठम हिँड्न मन लाग्छ। तर, उनी सहाराबिना उठ्न पनि नसक्ने भएकी छिन्।
डाक्टरले दिसापिसाबका लागि बेडमा बन्दोबस्त मिलाइदिएका छन्।
बेडको एकछेऊ आमा सुमित्रा छिन्। छोरीलाई के कसो पर्छ भनेर उनी रेखदेख गर्न बसेकी छिन्।
‘घरिघरि उठ्न खोज्छे,’ उनले भनिन्, ‘विस्तारै विस्तारै म उठाइदिन्छु।’
खाना नपकाएको निहुँमा पार्वती यो पीडाको भागिदार बनेकी हुन्।
विजयकुमार नियर उनका श्रीमान् हुन्। श्रीमानले काठले हिर्काएर उनको खुट्टा भाँचिदिएका हुन्।
‘खाना नपकाउनुमा मेरो दोष कत्ति पनि थिएन,’ पार्वतीले शुक्रबार रूँदै भनिन्, ‘घरमा ताल्चा लगाएको थियो मैले कसरी खाना पकाउन सक्थें र !’
मंसिर १५ गतेका दिन। विजयकुमार धान काट्न गएका थिए।
दिनको त्यस्तै ११/१२ बज्दो हो। विजयकुमार घर आइपुगे।
घरमा ताल्चा लागिरहेकै थियो। पार्वती आँगनमा त्यतिकै बसिरहेकी थिइन्।
‘खाना पाक्यो ?,’ विजयकुमारले सोधे।
‘कहाँबाट पाक्नु ?,’ पार्वतीले जवाफ फर्काइन्।
त्यति भन्नासाथ विजयकुमारले सखुवाको काठ टिपेर पार्वतीमाथि बजारे। एकैपटकको प्रहारले पार्वती थुचुक्क भइन्।
‘भगवान ठानेको मान्छे काल भएर अगाडि आयो,’ पार्वती भन्छिन्, ‘दुःखसुख बुझ्नुपर्ने श्रीमान्ले कुटेर थला पारे।’
...
झन्डै दुई साता त खुट्टा भाँचिएर खपिनसक्नु दुखाइ सहेर घरमै बस्नप¥यो।
‘के को अस्पताल लैजाउन र,’ आमा सुमित्राले आक्रोषपूर्ण भावमा भनिन्, ‘घरेलु औषधिले ठीक हुन्छ भन्दै राखेछन्।’
डाइनिया र गोविन्दपुर त्यतिधेरै टाढा हैन।
‘छोरीको हालखबर बुझ्दै जाँदा त बेहाल भइरहेको अवस्थामा फेला पारें,’ सुमित्रा भन्छिन्।
सुमित्राले ज्वाइँलाई हप्कीदप्की गरिन्। सिधै प्रहरी कार्यालय गएर उजुरी हालिन्।
त्यसपछि छोरीलाई उपचार गर्न कोसी अञ्चल अस्पताल ल्याइन्। गत आइतबारबाट उनको उपचार सुरू भयो।
विजयकुमार इलाका प्रहरी कार्यालय सिजुवाको हिरासतमा छन्। मोरङ प्रहरीका प्रहरी प्रवक्ता प्रभु ढकालका अनुसार विजयकुमारलाई कुटपिट तथा अंगभंग मुद्दामा अनुसन्धान थालिएको छ।
...
महिला हिंसाविरूद्वको पन्ध्र दिने अभियान देशव्यापी चल्दै थियो। पार्वती भने आफ्नै श्रीमान्बाट कुटाइ खाएर थलिइरहेकी थिइन्।
सुमित्राले नभेटेको भए उनी त्यतिकै कति थलिने थिइन् पत्तो थिएन।
न्यून पारिवारीक पृष्ठभूमिका भएकाले सानोतिनो कुरामा कहिलेकाहीँ झगडा हुनुलाई पार्वतीले सामान्य ठानेकी थिइन्।
कहिलेकाहीँ झगडा हुन्थ्यो। योपटक मात्र कुटाइ खाएकी हैनन् सुमित्राले। अलिअलि पहिले पनि कुटाइ खाएकी थिइन्।
तर यसपटकको कुटाइले उनको बाँकी जीवन कसरी बिताउने संकट पनि पैदा गरिदिएको छ।
‘दुखाइ खप्न नसकेर धेरै रोएँ,’ उनले भनिन्, ‘अहिले त यस्तो साह्रो दुख्छ।’
...
सुमित्रा घरमा लालाबाला अलपत्र छोडेर छोरीको उपचारमा खटिएकी छिन्। घरपट्टिबाट त्यतिराम्रो सहयोग मिलेको छैन।
‘रेखदेख गर्नुपरो भन्दा ज्वाइँ छुटाएर ले भन्छन्,’ सुमित्रा भन्छिन्, ‘यस्तो कुट्ने ज्वाइँलाई म कसरी छुटाएर ल्याऊँ ?’
पार्वर्ती अब लोग्नेको घर फर्किन चाहँदिनन्। बरू दुःख गरेर भए पनि आमासँगै बस्न चाहन्छिन्। छोराछोरी भएका छैनन्।
कुनै बहानामा मिलापत्रको दबाब आउला कि भनेर पार्वतीलाई पीर लागेको रहेछ।
‘मलाई यस्तो हालतमा पु¥याउनेलाई कडा कारबाही होस्,’ अस्पतालको बेडबाट उनको अनुरोध छ, ‘ममाथि परेको अन्याय सबैले बुझुन्।’
