सात वर्षसम्म बलात्कारविरुद्दको मुद्दा लडिरहेकी रोशनी (नामपरिवर्तन) विहिबार दिउँसो सर्वोच्च परिसरमा आफ्ना साथीभाइ र वकिलहरूसँग अंगालो मारिरहेकी थिइन्।
आफूलाई बलात्कार गर्ने व्यक्तिलाई अदालतले कैद सजाय सुनाएको खबर पाएपछि रोशनीको वाक्य बस्यो।
आफ्नो खुसी व्यक्त गर्न पनि उनलाई आँसुकै साहारा लिनुपर्यो।
मुद्दा जितेको खुसीमा उनी धित मरुन्जेल रोइन्। सर्वोच्चमा चार वर्ष मुद्दा झुलिरहँदा उनले न्यायको आश मार्न मात्रै बाँकी थियो।
यही मुद्दाकै लागि काठमाडौँमा बसेकी उनले कम्ती सकस भोगिनन्।
विहिबार, न्यायाधीश गोविन्दकुमार उपाध्याय र देवेन्द्र गोपाल श्रेष्ठको इजलासले उनीमाथि जर्बजस्ती करणी गर्ने नेपाल टेलिकमका शाखा अधिकृत यादव घिमिरेलाई पाँचवर्ष कैद सजाय दियो।
सर्वोच्चले सातवर्ष अघि पत्रकार महिलालाई बलात्कार गरेको ठहर गर्दै नेपाल टेलिकमका शाखा अधिकृत घिमिरेबाट पाँच वर्ष कैदसँगै पीडितलाई १ लाख ५० हजार क्षतिपूर्ति भराउने फैसला समेत गरेको छ।
यादव यसअघि नै पूर्पक्षको लागि र जिल्ला अदालतको फैसला अनुसार एकवर्ष ९ महिना कैद काटिसकेका छन्।
जिल्ला अदालत कास्कीले घिमिरेबाट ६ वर्ष कैद र डेढ लाख क्षतिपूर्ती भराउनुपर्ने फैसला गरेपनि पुनरावेदन अदालत पोखराले भने उनलाई सफाई दिएको थियो।
‘आफ्नो इज्जत, मान प्रतिष्ठामा नकारात्मक प्रभाव पार्ने र सुन्दर भविष्यको पारिवारिक तथा सामाजिक जीवनमा प्रतिकूल स्थितिको श्रृजना गर्ने प्रकृतीको उजुरी लिएर कुनै स्वाभिमानी महिला प्रहरी कार्यालय, स्वास्थ्य परीक्षणार्थ अस्पताल हुँदै कानुन र न्यायको शरणमा विना कारण अदालतसम्म आइपुग्दैनन्’ जिल्ला न्यायाधीश हरिकुमार पोखरेलले गरेको फैसलामा उल्लेख थियो।
जिल्लाले कैद सजाय दिएपछि घिमिरे पुनरावेदन अदालत गएका थिए। २०६६ साल असोज २९ गते पुनरावेदन अदालतका तत्कालिन न्यायाधीश ओमप्रसाद सुवेदी र खेमराज शर्माको संयुक्त इजलासले घिमिरेले रोशनीलाई जबरजस्ती नगरेको भन्दै सफाइ दिएका थिए।
पुनरावेदन अदालतको विरुद्ध महान्यायाधीवक्ता कार्यालयले २०६६ साल फागुनमा सर्वोच्चमा पुनरावेदन दिएको थियो।
२०६४ साल पुस १७ गते टेलिकममा जागिर लगाइदिने प्रलोभन देखाएर स्थानीय पत्रिकामा काम गर्ने रोशनी (नामपरिवर्तन)लाई घिमिरेले पोखरा ल्याएका थिए।
राती उनीहरू एउटै होटलमा बसेका थिए। रातको खाना खाएपछि रोशनीको कोठामा आएर घिमिरेले मार्ने सम्मको धम्की दिदैँ बलात्कार गरेका थिए।
न्यायको लागि जिल्लादेखि सर्वोच्चसम्म मुद्दा लडेकी रोशनीले सर्वोच्चको फैसलाले आफूलाई न्याय दिलाएको बताइन्।