पोखरामा निर्माणधिन अन्तर्राष्ट्रिय विमानस्थलमा मुअव्जाको विषयलाई लिएर स्थानीय र प्रहरीबीच झडप भएको छ। सरकारले वितरण गर्न लागेको मुअव्जा कम भएको भन्दै माटो परीक्षण र प्रथम चरणको मुअव्जा वितरण रोक्न प्राधिकरणको कार्यलयमा तालावन्दी गर्न गएका स्थानीय र प्रहरीबीच झडप भएको हो।
दोहोरो झडप हुँदा तीन जना प्रहरी र ९ जना स्थानीय घाईते भएको प्रहरीले जनाएको छ। घाईतेलाई उपचारका लागि पश्चिमान्चल क्षेत्रीय अस्पताल र मणिपाल अस्पतालमा लगिएको छ। स्थानीयले तालाबन्दी गर्ने क्रममा प्रहरीसँग झडप भएको हो। प्रहरीले स्थिति नियन्त्रणमा लिन तीन सेल अश्रु ग्याँस प्रहार गरेको थियो। झडप पछि आक्रोशित स्थानीयले आधा घण्टा पृथ्वीराजमार्ग अवरुद्व गरेका थिए।
सरकाले उचित मुअब्जा दिनु पर्ने माग गर्दै केहि समयदेखि विभिन्न चरणका शान्तीपूर्ण आन्दोलन गर्दै आएको सर्घष समितिका संयोजक बोधराज कार्कीले बताए।पोखरा विमानस्थल निर्माणका लागि सरकारले २०३२ सालमा अधिग्रहण गरेको ३१ सय रोपनी जग्गा नपुग भएपछि अहिले थप ६ सय २९ रोपनी जग्गा अधिकरण गर्न लागेको हो।
कास्कीका प्रमुख जिल्ला अधिकारीको संयोजकत्वमा कास्की मालपोत, विमानस्थल आयोजना, नापी, स्थानीय विकास अधिकारी तथा पोखरा उपमहानगरपालिका प्रमुखहरु सदस्य रहेको टोलीले थप जग्गाको मुअव्जा प्रति रोपनी २० लाख देखि ४२ लाख रुपैयाँ मुल्य निर्धारण गरेको थियो। स्थानीयले चलनचल्तीको भाउभन्दा निकै कम मूल्य निर्धारण भएको भन्दै आन्दोलनका कार्यक्रमहरु गर्दै आएका थिए। सरकारले अघिल्ले वर्ष र यो वर्ष गरी छुट्याएको साढे २ अर्ब रुपैयाँवाट पहिलो चरणको ८० रोपनी जग्गाको मुअव्जा वितरणका गर्न लागेको हो।