लेफ्टिनेन्ट कोर्सबिनै बिट्रिश गाेर्खा सेनाको लेफ्टिनेन्ट कर्णेलमा पुन:एकजना नेपाली पुगेका छन्। नेपालको गुल्मी घर भएका यमबहादुर राना बिट्रिश गाेर्खाको उच्च पद लेफ्टीनेन्ट कर्णेलमा पुगेका हुन्।
प्रकृयागत पदोन्नति मार्फत बिट्रिश गाेर्खाको उच्च पदस्थ अधिकृत लेफ्टिनेन्ट कर्णेलमा बढुवा भएका हुन्। ब्रिटिश आर्मीको बढुवा समितिले यही साता उनलाई पदोन्नति गर्ने निर्णय गरेको हो। हालसम्म यो पदमा अरु दुई जना नेपाली पुगी सकेको भए पनि सेकेन्ड लेफ्टिनेन्टको कोर्स बिनै यो पदमा पुग्ने उनी पहिलो नेपाली हुन्। यसअघि बिट्रिश गाेर्खामा लालबहादुर पुन र बिजय राउत पनि लेफ्टिनेन्ट कर्णेल भएका थिए।
बिट्रिश गाेर्खाको ब्रिगेड अफ गोर्खाजको मुख्यालयमा काम गरिरहेका रानाको मातहतमा अब एउटा छुट्टै बटालियन रहनेछ। सेनाको सिपाहीबाट ब्रिटिश आर्मीको यो तहसम्म पुगेर उनले बेलायती गोर्खालीमाझ इतिहास रचेका छन्। प्रतिस्पर्धामा थुप्रै गोराहरुलाई पछाडि पार्दै उच्च पदस्थ बनेका रानाले कठोर परिश्रम र दृढता नै सफलताको कारक बताएका छन्।
गुल्मीको लिम्घाबाटै प्राथमिक शिक्षा लिएका रानाको बुवा र हजुरबुवा पनि लाहुरे पृष्ठभूमिमै थिए। चिकित्सक बन्ने सोचले काठमान्डौंको महाराजगंजमा मेडिकल कलेज पढ्दा पढ्दै परिवारको दवाबमा उनी बेलायती सेनामा भर्ती भएका थिए। रानाले सेवा अवधिमै बेलायतको बोर्न माउथ युनिभर्सिटीबाट बिएससी अनर्स र मास्टर्स गरेका थिए।
उनको यो अध्ययनको निरन्तरताले पनि यहाँसम्म पुग्न मद्दत गरेको उनको बुझाई छ। बेलायती सेनामा कार्यरत गोर्खाली सैनिकहरुलाई पक्षपातपूर्ण व्यवहार हुने आरोपका बीच रानाको उच्च तहमा भएको पदोन्नतिले सेवामा रहेका भावी पुस्तालाई समेत सम्भावनाको ढोका खोलीदिएको छ।
सन् १८१४को नेपाल-अंग्रेज युद्दमा नेपाललाई कब्जा गर्न नसकेपछि बहादुर गोर्खाली सैन्यलाई आफ्नो टुकडीमा भर्ती गर्ने अंग्रेजको नीतिअनुरुप सुरु भएको गोर्खा भर्तीले दुई शताब्दी पूरा गरीसकेको छ। पूर्वी नेपालका राई लिम्बु तथा मध्य पश्चिमका गुरुङ मगरहरुको बाहुल्यता रहेको बेलायतको गोर्खा ब्रिगेडमा भर्ती हुने आकर्षण भने नेपाली समुदायमा अझै छ।
गोर्खालीहरुको बेलायती सेनामा भर्ती सुरु भएको दुई सय वर्षको ईतिहास बन्दै गर्दा बेलायतले भने नेपालबाट सेनामा नयाँ भर्ना लिने संख्यामा उल्लेख्य कटौती गर्दै आईरहेको छ। हाल बेलायती सेनामा झन्डै चार हजार गोर्खाली सैनिकहरु कार्यरत छन्। सेनाबाट अवकास प्राप्त हजारौँ गोर्खाली परिवारहरु बेलायतमा बसोबास गर्दै आएका छन्।
