सबै तस्बिरहरु जुम्लाबाट लक्ष्मीशाेभा शाक्य सेताेपाटीका लागि उपलब्ध गराएकी हुन्।
चिसो बढने क्रमसँगै शनिबार अपरान्हदेखि उच्च पहाडी भेगमा हिमपात सुरु भएको छ । पहाडीभेगहरू जुम्ला, हुम्ला, मुस्ताङ, मनाङलगायतका पहाडी भेगमा हिँऊ पर्न थालेको जानकारी स्थानीय बासिन्दा तथा प्रहरीले दिएका छन्।
स्थानीय विकास कार्यकर्ता लक्ष्मीशोभा शाक्यका अनुसार एक घण्टादेखि जु्म्लामा हिऊ पर्न थालेको हो।
‘हिँऊले बिस्तारै रुखहरू छोप्न थालेको छ’ शाक्यले सेतोपाटीसँग भनिन्, ‘हिऊ पर्न थालेपछि जंगल गएका महिलाहरू घर फर्कन थालेका छन्,’ शाक्यले भनिन्, ‘भुइँ अब पूरै हिऊले भरिइसकेको छ। यहाँका राता, निला आदि छानाहरू हिऊले पूरै ढाकिसकेको छ ।’
उनका अनुसार, बालबालिकाहरू भने चिसोको वास्तै नगरी हिँऊमा चिप्लेटी खेल्न थालिसकेका छन् ।
‘महिलाहरू चप्पल गाएरै हिडिरहेका छन्,’ शाक्यले भनिन् ।
हुम्लामा पनि दिउँसो १२ बजेदेखि अचानक हिमपात भएको हो। राष्ट्रिय समाचार समितिका अनुसार, हिमपातका कारण हवाई सेवा समेत बन्द भएको छ ।
खाद्यान्न ओसार्ने यस जिल्लाको एकमात्र विकल्प हवाई सेवा हिमपातका कारण बन्द हुँदा यहाँ खाद्य अभाव सिर्जना हुनेभएको छ । खाद्य संस्थानमा कर्मचारी नभएका कारण जनताले खाद्य सामग्री लैजान पाएका छैनन् ।
जोमसोममा साढे चार फिट हिउँ
हिमाली जिल्ला मुस्ताङमा पनि भारी हिमपात भएको छ। शनिबार २ बजेबाट हिउँ पर्न थालेको हो।
त्यहाँको जनजीवन कष्टकर बनेको जिल्ला प्रहरी कार्यलयका डिएसपी गोविन्द पाठकले सेतोपाटीलाई जानकारी दिए।
पाठकका अनुसार सदरमुकाम जोमसोम बजारमा साढे चार फिट हिउँ जमेको छ भने एअरपोर्टको धावनमार्गमा पनि तीन फिट हिउ जमेको छ।
जोमसोम बजारका केही होटलबाहेक सबै पसल बन्द छन। मानिसहरु घर बाहिर निस्कन सकेका छैनन। जिल्लाको तल्लो भेगमा भने वर्षा पनि भएको छ।
मनाङका प्रहरी प्रमुख डिएसपी राजेन्द्रबावु रेग्मीका अनुसार जिल्लाका ७० प्रतिशत भागमा हिमपात भएको छ।
सदरमुकाम चामेबजारमा १ फिट जति हिउँ जमेको छ। हिमपातले त्यहाँको सामान्य जनजीवन पनि प्रभावित भएको छ। हिमपात जारी छ।
हिमपातको आधिकारिक मापन हुन सक्दैन
जल तथा मौसम विज्ञान विभागले हिमाली क्षेत्रमा भएको हिमपात मापन गर्न सक्दैन। विभागका मौसदविद् राजु प्रधानांगले उपकरणको अभावले हिमाली क्षेत्रमा भएको हिमपात नाप्ने नसकिन बताए। ‘हिमाली क्षेत्रको हिमपातका बारेमा मिडियामा आएका समाचारका आधारमा विभागले जानकारी पाउने हो’ उनले भने।
