कतारले नेपाली श्रमिकहरुको इमान्दारी, विश्वसनीयता र परिश्रमको उच्च सम्मान गर्दै दक्ष कामदार पठाउन नेपाल सरकारसँग अनुरोध गरेको छ।
नेपाली जनशक्तिलाई रोजगारी उपलब्ध गराउने सम्बन्धमा तीन दिनअघि कतारको राजधानी दोहामा सम्पन्न तीनदिने नेपाल–कतार उच्चस्तरीय बैठकमा कतारले त्यस्तो अनुरोध गरेको हो।
कतारले आफ्नो मुलुकको कानुनअनुसार नेपाली श्रमिकको हकहितको रक्षा गर्ने प्रतिबद्धता व्यक्त गर्दै नेपाली कामदार आपूर्तिका क्रममा नेपालमा हुने ढिलासुस्ती र प्रक्रियालाई सरल तुल्याउन अनुरोध गरेको बैठकमा नेपाली प्रतिनिधिमण्डलको नेतृत्व गर्नुभएका श्रम तथा रोजगार मन्त्रालयका सहसचिव बुद्धिबहादुर खड्काले बताए।
बैठकमा नेपाली कामदारलाई रोजगारी दिने सम्बन्धमा दुबै पक्षबीच १५ बुँदे सहमति भएको जानकारी दिँदै उनले काठमाडौँस्थित कतारी दूतावासलाई पूर्णरुपमा सञ्चालन गरी रोजगारीसम्बन्धी सबै प्रक्रियागत कार्य पूरा गर्न अनुरोध गरिएको बताए।
प्रक्रियागत सरलीकरणका लागि नेपालले दुबै मुलुकका निजी क्षेत्रका रोजगार व्यवसायीको संयुक्त बैठक गर्न राखेको प्रस्तावप्रति कतारले सहमति जनाएको जानकारी गराए।
झण्डै नौ वर्षपछि भएको द्विपक्षीय बैठकमा भएको सहमतिअनुसार विशेष गरी महिला घरेलु कामदारसम्बन्धी छुट्टै व्यवस्था हुन र त्यसको पुनरावलोकन गर्न नेपालले गरेको आग्रहप्रति कतारले सकारात्मक जवाफ दिँदै त्यसबारेमा गृह मन्त्रालयसँग परामर्श गर्ने जनाएको छ।
त्यसैगरी, मागपत्र र सम्झौतामा उल्लेख भएबमोजिमको तलबभत्ता नेपाली श्रमिकले नपाएको गुनासोको तत्काल सम्बोधन गर्न र सम्झौता विपरीत गर्ने कतारी कम्पनीविरुद्ध कानुनी कारबाही गर्न पनि कतार सहमत भएको छ।
कतार आएको तीन महिनासम्म पनि नेपाली श्रमिकलाई परिचयपत्र नदिने केही कतारी कम्पनीको व्यवहारले नेपाली मर्कामा परेकाले उनीहरूलाई परिचयपत्र दिन गरिएको आग्रहलाई गम्भीररुपमा लिँदै कतारले श्रम मन्त्रालयको कार्यक्षेत्रमा परिचयपत्र वितरण नभएकाले हाललाई अस्थायी …पास' दिन र त्यससम्बन्धी समस्या समाधान गर्न गृह मन्त्रालयलाई अनुरोध गर्न पनि कतारले सहमति जनाएको छ।
नेपाली जनशक्तिलाई रोजगारी उपलब्ध गराउनेसम्बन्धी अर्को संयुक्त बैठक दुबै पक्षलाई उपयुक्त हुने समयमा नेपालमा गर्न नेपाल र कतार सहमत भएका छन्।
गत शनिबार भएको द्विपक्षीय सम्झौतामा सहसचिव खड्का र कतारका श्रमसचिव हुसेन युसुफ अल मुल्लाहले हस्ताक्षर गरेका हुन्। रासस
