कैलालीको सहजपुर गाविस खाँनीडाँडामा आज भएको बस दुर्घटना चालकको लापरवाहीले भएको घाईतेले बताएका छन्।
उनीहरुले सडक किनारमा रोकेको बस चालक भागेको केही समयपछि भीरबाट खसेको बताए। दुर्घटनामा घाईते भएका डोटीको डौड गाविस वडा नम्बर २ का २८ वर्षका बमबहादुर नागरीले रोकेको करिव ४ मिनेट पछि बस भीरबाट खसेको बताए।
'म बसको क्याबिनमा थिए। ड्राइभर बाहिर निस्कियो। मैले के भयो भनेर सोधे। टायर पञ्चर भयो भन्यो,' उनले भने, 'त्यसको केही समयपछि बस भीरबाट खस्यो।'
अत्तरीयास्थित सेवा नर्सिङ होममा उपचार गराईरहेका नगारीले चालकले जानीजानी बस भीरबाट फालेको बताएका छन्।
अर्का घाईते सोही गाविस वडा नम्बर १ का वर्ष २३ का कर्णबहादुर नेपालीले समेत दुर्घटनामा चालकको चरम लापरवाही रहेको बताएका छन्। उनले यात्रुहरुलाई बाहिर निस्कन नभनेर चालक बस रोकेर भाग्नु चरम लापरवाही भएको बताए।
'बस रोकेको समयमा उसले हामीहरुलाई बाहिर जान भन्नुपर्थ्यो,' उनले भने–'हामीलाई बचाउनेतर्फ ड्राइभरले कोशीस गरेन।'
भारतको मद्रासमा आमा र भाउजुको उपचारका लागि जान लागेका सोही ठाउँका वर्ष २२ का महेन्द्र नेपाली पनि दुर्घटनामा घाईते भएका छन्। उनले आफ्नी आमा र भाउजु समेत दुर्घटनामा परेर घाईते भएको बताए।
'आमा र भाउजुलाई उपचार गर्न जान लागेको थिए आफै दुर्घटनामा परे,' उनले भने, 'तर त्यत्ति धेरै चोट लागेको छैन।'
टाउकोमा चोट लागेका उनले समेत दुर्घटनामा चालककै लापरवाही भएको बताए। उनले बस भित्रै भेटिएको सिरकले टाउको जोगाएको बताए।
'बस भीरबाट खस्यो केही सोच्नै सकिएन। टाउको जोगाउनु पर्छ भन्ने लाग्यो। छामछुम गर्दा सिरक भेटियो। त्यसै भित्र गुटमुटिए,' उनले भने, 'बस रोकिएको ठाउँमा म लगायत १४ जना जति थियौं।'
अत्तरीयास्थित पद्मा अस्पतालमा उपचार गराईरहेका अर्का घाईते डौड गाविस वडा नम्बर ५ का वर्ष १९ का हर्कबहादुर खड्काले बस भित्र करिव ४० जना यात्रु रहेको बताए। उनले सिट भन्दा २/४ जना यात्रु थप रहेको बताएका छन्।
'बस भित्र धेरै यात्रु त थिएन,' उनले भने, 'रोकेको बस गुडेरै दुर्घटना भएको हो। बस किन रोकियो खास कारण त्यो हो।'
उनले भने–'हामीले के भयो भनेर सोध्दा टायर पञ्चर भयो भनेको थियो। तर भएको के थियो हामीलाई थाहा भएन।'
बसका सह चालक कञ्चनपुरका नविन भट्टले बसको टायर पड्किएका कारण दुर्घटना भएको बताएका छन्।
टाउकोमा चोट लागेर सेवा नर्सिङ होममा उपचार गराईरहेका सहचालक भट्टले आफू ढोकाबाट हाम फालेर जोगिएको बताए।
'म ढोका थिए। गाडी भीरबाट खसेको थाहा पाएपछि हाम फाले,' उनले भने, 'त्यसपछि के भयो मैले थाहा पाएन।'
उनले ड्राइभरको सिट मुनिको टायर पड्किएको बताए। उनले बस भित्र ३५ जना यात्रु मात्रै रहेको दावी गरेका छन्।
बसका घाईते यात्रुलाई दिईएको शैलेश्वरी यातायात व्यवसायी संघको टिकटमा बस नम्बर २५९१ उल्लेख छ। घाईतेले आफूहरुलाई बस काउण्टरका कर्मचारीले एउटा बसको टिकट काटेर अर्को बसमा चढाएको बताएका छन्।
डोटीको दिपायलबाट कञ्चनपुरको महेन्द्रनगरका लागि हिँडेको ना ५ ख ५४२० नम्बरको बस सहजपुर गाविस वडा नम्बर २ खाँनीडाँडामा दुर्घटना भएको हो। बसका चालक कञ्चनपुर भासीका जनकराज गिरीलाई प्रहरीले खाँनीडाँडाबाट पक्राउ गरेको छ।
