कैलालीको सहजपुर गाविस वडा नम्बर २ खाँनीडाँडामा भएको बस दुर्घटनामा मृत्यु हुनेको संख्या १२ पुगेको छ। जिल्ला प्रहरी कार्यालय कैलालीका अनुसार मृत्यु हुने सबैको सनाखत भएको छ। मृत्यु हुनेमा डोटीको डौड गाविसका ५२ वर्षीया विस्ना भण्डारी, ४० वर्षीया टिपुरी नागरी, ३५ वर्षीया तुली नागरी, ४० वर्षका रेनुवा नागरी, ३० वर्षका टेकबहादुर बोगटी, वर्ष ४० का जम्मबहादुर भण्डारी, वर्ष ४० का विरे लुहार रहेका छन्। त्यसैगरी डोटीको गगुडाका ३३ वर्षका प्रेमबहादुर कामी, बासुदेवीका ढुल्ले नेपाली, देवुली नेपाली, सागर नेपाली र कलु नागरी रहेको प्रहरीले जनाएको छ।
डोटीको दिपायलबाट कञ्चनपुरको महेन्द्रनगर तर्फ आईरहेको महाकाली यातायातको ना ५ ख ५४२० नम्बरको यात्रुबाहक बस आज बिहान १ बजेतिर दुर्घटना भएको थियो। दुर्घटनामा ८ जनाको घटनास्थलमा र अन्य ४ जनाको उपचारका क्रममा मृत्यु भएको प्रहरीले जानकारी दिएको छ। दुर्घटनामा घाईते भएका मध्ये नौ जनाको पद्मा अस्पताल, १४ जनाको सेवा नर्सिङ होममा उपचार भैरहेको छ भने ६ जनालाई थप उपचारका लागि भारत रिफर गरिएको छ। फरार रहेका चालक कञ्चनपुर भासीका जनकराज गिरीलाई प्रहरीले खाँनीडाँडाबाटै पक्राउ गरेको छ । क्षेत्रीय ट्राफिक प्रहरी कार्यालय अत्तरीयाका अनुसार बस सडकबाट करिव ४ सय मिटर तल खसेको छ ।