मंसिर १० र ११ गते हुने सार्क शिखर सम्मेलनमा सबैभन्दा बढी ९ गते राजधानीको सडक यातायात प्रभावित हुने भएको छ।
त्यस दिन सात राष्ट्रका ‘भिआइपी’हरू काठमाडौं आइपुग्ने भएकाले उपत्यकाको ट्राफिक व्यवस्था बढी प्रभावित हुने डिआइजी केशव अधिकारीले बताए।
सार्क सम्मेलनमा राजधानीको ट्राफिक ब्यवस्थापनबारे महानगरीय ट्राफिक प्रहरीले शुक्रबार गरेको पत्रकार सम्मेलनमा डिआइजी अधिकारीले सार्क सभास्थल राष्ट्रिय सभागृह रहेको रत्नराज्य लक्ष्मी क्याम्पसको बाटो र पुरानो बसपार्क छिर्ने शंकरदेव क्याम्पस अघिको ठाडो बाटोमा १० र ११ गते सवारी निषेध गरेको जानकारी दिए।
अधिकारीका अनुसार ट्राफिक ब्यवस्थापन सहज बनाउन उपत्यका भित्रका सार्वजनिक सवारी साधन सम्बन्धित रुटमा २० मिनेटको अन्तरालमा मात्र छुटने ब्यवस्था मिलाइएको छ।
सभागृहसँगै रहेको भृकुटीमण्डपमा रोक्ने गाडीलाई शहिद गेट र भद्रकालीमा यात्रु ओराल्न र चढाउन रोकिनेछ। पछिल्लो अंकका आधारमा जोर बिजोरको ब्यवस्था मिलाइएको छ। विवाहमा दुलाहा दुलही बोकेको गाडीलाई भने जोर बिजोर लागू हुने छैन।
राष्ट्रिय सभा गृह गेट रहेको बाटोमा १० र ११ गते पैदल यात्रुलाई पनि निषेध गरिएको छ।
सार्क अवधिभर ट्राफिकसम्बन्धी जानकारीका लागि प्रहरी नायब निरीक्षक प्रकाश थापाको संयोजनमा सूचना प्रवाह समिति पनि गठन गरिएको छ। ट्राफिकको हट लाइन १०३ वा फोन ०१– ४२१९६४१, ४२३३१०८ मा सम्र्पक गरी सहयोग लिन सकिने पनि अधिकारीले जानकारी दिए।
