आगामी मंसिर १० र ११ गते काठमाडौंमा हुने दक्षिण एसियाली क्षेत्रिय सहयोग संगठन सार्कको शिखर सम्मलेनका बेला राजधानीमा हुने ट्राफिक व्यवस्थापन गर्न ट्राफिक प्रहरीले मंसिर ८ देखि १२ गतेसम्म जोर बिजोर नम्बरका आधारमा सवारी चल्न दिने भएको छ।
मंसिर ८, १० र १२ गते जोर नम्बरका सवारी साधन चल्नेछन भने ९ र ११ गते बिजोर नम्बरका सवारी साधन चल्नेछन। सवारी साधनका पछाडिका दुई नम्बरको आधारमा जोर बिजोर छुट्टाइने ट्राफिक प्रहरी महाशाखा स्रोतले बतायो। जोर बिजोरको नियम चक्रपथ भित्रमात्र लागू हुनेछ।
ट्राफिक स्रोतका अनुसार प्रेस, कुटनीतिक नियोग, पर्यटन र आकस्मिक सेवा (एम्बुलेन्स, दुध, पानी आदि) का सवारीमा जोर बिजोरको नियम लागू हुने छैन। मंसिर ८ देखि १२ गतेसम्म सवारी रुटमा रहेका पेट्रोल पम्प र ग्यारेजहरु पनि बन्द हुनेछन्।
सम्मेलनस्थल राष्ट्रियसभा गृह पछाडि रहेको पुरानो बसपार्क ८ गतेदेखि नै खाली गरिनेछ। पुरानो बसपार्कमा आउने सवारीलाई थापाथली, टेकु, माइतीघर, सानो गौचरण र लाजिम्पाटबाट फर्कानेछ।
गृह मन्त्रालयका प्रवक्ता लक्ष्मी प्रसाद ढकाल भन्छन्-
कुनै पनि रुटमा सवारी चलाउन नपाउने भन्ने नतोकिएको र भिआइपीहरुको सवारी हुँदा सवारी रुटमा अन्य सवारी साधन चल्न नपाउने छन्।
चक्रपथ भित्र छिर्ने सार्वजनिक सवारी साधनलाई पनि निश्चित संख्या तोकी आवातजावात गराउने योजना रहेको पनि उनले जानकारी दिए। मंसिर ९ देखि १२ गते सम्म विद्यालयहरु बन्द गरिने र १० र ११ गते सार्वजनिक विदाका कारण उपत्यकाको सवारी चाप धेरै न्युन हुने भएकाले सम्मेलन अवधीमा ट्राफिक ब्यवस्थापन सहज हुन्छ।
