राज्यको गलत नीतिका कारण उज्यालोको पर्वमा समेत पर्साका बासिन्दा अँध्यारोमै बस्न बाध्य भए। पर्साका एक दर्जनभन्दा बढी गाउँमा जलेको ट्रान्सफर्मर नफेर्दा तिहार र छठजस्ता पर्वमा पनि बिद्युत आपूर्ति हुन सकेन। नेपाल विद्युत प्राधिकरण वीरगन्ज बितरण केन्द्रमा एउटा पनि वैकल्पिक ट्रास्फर्मर नभएकाले स्थानीयलाई यस्तो सास्ती खेप्नुपरेको हो।
पर्साको रामगढवा, टिहुकी, एकटांगा, चैनपुरलगायतका दर्जनौं गाउंका बासिन्दा महिनौंदेखि अँध्यारोमा बसिरहेका छन्। ओभरलोड र हुकिङका कारण जलेका ट्रान्सफर्मर मरमतका लागि हेटौडा क्षेत्रीय कार्यालयमा पठाइएको बितरण केन्द्रका प्रमुख ऋषिकुमार वरनवालले बताए। उनले ट्रान्सफर्मर मर्मत भएरपछि बिद्युत आपूर्ति सुचारु गरिने जानकारी पनि दिए। 'यो समस्या दुई वर्षदेखि झेलिरहेका छौं। पहिला केन्द्रबाट वर्षमा २०–२५ ओटा नयाँ ट्रान्सफर्मर आउँथ्यो। तर, अहिले निल छ,' उनले भने। तीन वर्षदेखि पुरानोलाई मर्मत गरेर काम चलाउनु परेको उनले बताए।
ग्राहक र उपभोग बढेको तर त्यसका तुलनामा पूर्वाधार विस्तार नभएकाले आपूर्तिमा समस्या भएको प्राधिकरणले जनाएको छ। प्राधिकरणले वीरगञ्ज–पथलैया करिडरमा पनि विगत करिब २ वर्षयता नयाँ औद्योगिक ग्राहकलाई लाइन बितरण गरेको छैन।
जीर्ण पूर्वाधार र लोडसेडिङका कारण नयाँ औद्योगिक लाइन बितरण हुन नसकेको प्राधिकरणले जनाएको छ। नयाँ लाइन बितरण बन्द भएपछि मुलुककै मुख्य औद्योगिक करिडरका उद्योगीहरुलाई समस्या परेको छ।
प्राधिकरणले प्रशारण लाइन र ट्रान्सफर्मर पुराना र लोड धान्न नसक्ने भन्दै नयां लाइन नदिन मातहतका निकायलाई पत्राचार गरेपछि बितरण बन्द भएको विद्युत् बितरण केन्दले जनाएको छ। वीरगञ्ज वितरण केन्द्रले गार्हस्थ प्रयोजनका लागि थ्री फेज लाइनको बितरण समेत बन्द गरेको छ। 'गार्हस्थमा नयाँ थ्री फेज लाइन दिएका छैनौं। ट्रान्सफर्मरको क्षमता नबढाएसम्म समाधान सम्भव छैन' केन्द्रका प्रमुख वरनवालले भने।
करिडरका उद्योग प्रतिष्ठानमा प्राधिकरणको वीरगञ्ज र सिमरा बितरण केन्द्रले विद्युत् आपूर्ति गर्दै आएका छन्। परवानीपुर–वीरगञ्ज खण्डका १९ फिडरमध्ये ८ ओटा औद्योगिक फिडर छन्। करिडरमा करिब २ हजार ३ सय औद्योगिक ग्राहक रहेको प्राधिकरणले जनाएको छ। करिडरका अधिकांश ट्रान्सफर्मर ओभरलोडमा चलेका छन्। ट्रान्सफर्मरको क्षमता बढाउने योजना भए पनि विगत तीन वर्षयता नयां ट्रान्सफर्मर नआएको प्राधिकरणले जनाएको छ।
ट्रान्फर्मरमा ओभरलोडका कारण दैनिक औसत १० पटक टि्रपिङ हुने गरेको उद्योगीहरुले बताएका छन्। ट्रिपिङका कारण उद्योगका उपकरण नचल्ने र चले पनि उत्पादनको गुणस्तर नआउने उनीहरुको गुनासो छ। करिडरका उद्योगमा अनियमित ट्रिपिङबाट उपकरण बिग्रिने, कच्चा पदार्थ खेर जाने, उत्पादकत्वमा कमीजस्ता समस्या देखिएको उद्योगीहरुले बताए।
पर्साको विद्युत् आपूर्ति सहज तुल्याउन कम्तिमा ६० ओटा नयाँ ट्रान्फर्मर आवश्यक पर्ने वीरगञ्ज बिरतरण केन्द्रको भनाइ छ। केन्द्र प्रमुख वरनवालले सहर र ग्रमीण क्षेत्रमा ३०/३० ओटा ट्रान्फर्मर उपलब्ध भए आपूर्तिमा समस्या नहुने पनि बताए।