नेपाल प्रहरीले गरेको सर्वेक्षणमै नौ प्रतिशत उत्तरदाताले प्रहरीले घुस नलिई कामै नगर्ने गरेको गुनासो गरेका छन् ।
प्रहरी प्रधान कार्यालय नक्सालमा आज सार्वजनिक गरिएको ‘नेपाल प्रहरी सङ्गठनप्रति आमनागरिकको धारणा सर्वेक्षण २०७१’ मा प्रहरीको दैनिक कार्यलाई कसरी लिनुभएको छ भन्ने प्रश्नमा भनसुनका आधारमा १८ प्रतिशत काम हुने गरेको, सेवा चुस्त र दुरुस्त छ भन्नेमा १२ प्रतिशत ,पहिलेको भन्दा सुधारिएको छ भन्नेमा ६१ प्रतिशत र घुस नदिई कामै हुँदैन भन्नेमा नौ प्रतिशत जवाफ आएको उल्लेख छ ।
नागरिकको हैसियतले प्रहरी कर्मचारीसँग सम्पर्क गर्दा कस्तो व्यवहार गरेको पाउनुभएको छ भन्ने प्रश्नमा, ठीकै (सामान्य) मा ५९ प्रतिशत, राम्रोमा ३३ प्रतिशत, अत्यन्त राम्रोमा ५ प्रतिशत र नराम्रोमा ३ प्रतिशत उत्तरदाताहरूको जवाफ सर्वेक्षणमा आएको छ ।
सहभागीमध्ये ८२ प्रतिशतले प्रहरीले काम गर्दा अनूचित लाभ नलिने गरेको जवाफ दिएका छन् भने १८ प्रतिशतले अनुचित लाभ लिने गरेको गुनासो गरेका छन् ।
प्रहरी कार्यालयमा पर्ने जाहेरी दरखास्तको सम्बन्धमा काम छिटो छरितो गर्न सहभागीमध्ये ५२ प्रतिशत उत्तरदाताले प्रहरीले कोशिस गरेको हुन्छ भन्ने बताएका छन् भने १३ प्रतिशतले कोशिसनै नगर्ने गरेको जवाफ दिएका छन् ।
सडक दुर्घटनालाई न्यूनीकरण गर्न प्रहरीले ट्राफिक नियमलाई कडाईका साथ कार्यान्वयन गर्नुपर्दछ भन्नेमा ५३ प्रतिशत, ट्राफिक जनचेतना कार्यक्रम सञ्चालन गर्नुपर्दछ भन्नेमा ३९ प्रतिशत र मादक पदार्थ सेवनको जाँच गर्नुपर्छ भन्नेमा ८ प्रतिशत उत्तरदाताले जवाफ दिएका छन् ।
सर्वेक्षणमा सहभागीमध्ये ६७ प्रतिशत उत्तरदाताले प्रहरीलाई आफूले सूचना दिएर सहयोग गरेको पाइयो भने ३३ प्रतिशतले प्रहरीलाई कुनै सूचना नदिइएको पाइएको छ ।
नेपाल प्रहरीले जनताको विश्वास जित्न के गर्नुपर्ला भन्ने प्रश्नमा जिम्मेवार तथा पारदर्शी ढङ्गबाट काम गरेमा मात्र जनताको विश्वास जित्न सक्छन भन्नेमा ६६ प्रतिशत, जनसम्पर्क अभिवृद्धिमा १६ प्रतिशत र अपराधको रोकथाममा सक्रिय हुनुपर्छ भन्नेमा १८ प्रतिशत उत्तरदाताको धारणा रहेको पाइएको छ ।
नेपाल प्रहरीले प्रदान गरिरहेको सेवा विश्वसनीय र भरपर्दो छ भन्नेमा सर्वेक्षणमा सहभागी ८२ प्रतिशत र १८ प्रतिशतले विश्वसनीय नभएको जवाफ दिएका छन् ।
सहभागी मध्ये ५५ प्रतिशतले आफ्नो क्षेत्रमा प्रहरीले सामान्य गस्ती गर्ने गरेको, ३७ प्रतिशतले कहिलेकाही मात्रै गस्ती गर्ने गरेको र ८ प्रतिशतले बाक्लो गस्ति गर्ने गरेको जवाफ दिएका छन् ।
५८ प्रतिशतले सेवामुखी भावना, २५ प्रतिशतले शिष्ट र १७ प्रतिशतले सामान्य रुपमा प्रहरीले काम गरुन भन्ने अपेक्षा लिएको जवाफ दिएका छन् ।
नागरिक र प्रहरी दुवैले मिलेर काम गरेमा अपराध रोकथाम र अनुसन्धान कार्य सफल हुने कुरामा ८२ प्रतिशत सहभागी सहमत रहेको पाइएको छ ।
समाजमा शान्ति सुरक्षा कायम गर्न नेपाल प्रहरीको आवश्यकता रहेकोमा ९६ प्रतिशत उत्तरदाताको सहमत रहकोे पाइएको छ भने आश्यकतानै छैन भन्नेमा १ प्रतिशत उत्तरदातामात्रै पाइएको छ ।
नागरिक वडापत्रलाई सुधार गर्दै अक्षरस कार्यान्वयन गर्नतर्फ जोड दिनुपर्ने भन्नेमा ५२ प्रतिशत प्रहरीले नागरिकको मानव अधिकार संरक्षणमा उच्च प्राथमिकता दिएको सर्वेक्षणमा सहभागीमध्ये ६३ प्रतिशत नागरिकको जवाफ पाइएको छ ।
सर्वेक्षण सार्वजनिक गर्दै प्रहरी प्रवक्ता प्रहरी नायव महानिरीक्षक माधव जोशीले सङ्गठनलाई सुधार गर्ने उद्देश्यसहित सर्वेक्षण गरिएको बताए।
उनले सर्वेक्षण सन्तुष्टिका लागि मात्रै नभई सुधार गर्ने उद्देश्यसहित गरिएको बताउँदै प्रहरीको सेवा प्रवाहबारे जनताको राय बुझ्न पाइएको उल्लेख गरे। रासस