वीरगंज उपमहानगरपालिका वडा नं. १९ गहवाकी १५ वर्षे किशोरी मिनु भन्ने राधिका शर्मा हराएको २० दिन बितिसक्दा पनि उनको कुनै आतोपत्तो छैन।
'छोरी हराएपछि यसपाली न तिहार मनायौं, न छठको उत्साह छ,' राधिका कि आमा शुधा शर्माले भनिन्, 'हामीले प्रहरीलाई यस बिषयमा जानकारी गराएका छौं, जिल्ला प्रहरी कार्यालयमा जाँदा अनुसन्धान हुदैछ भनेर फर्काइयो।'
हराएकी राधिकाकी आमा धैर्य गुमाएकी देखिन्छन्। असोज २४ गते बिहान ७ बजे घर नजिकै रहेको कन्चनजंघा माविमा पढ्न निस्केककी छोरी बेपत्ता भएकी हुन्। कक्षा ९ मा अध्ययनरत राधिका घरबाट नियमित झैं बिद्यालयको कक्षा सुरु हुनुअघिको 'एक्स्ट्रा क्लास' पढ्न कपी–किताबको झोला भिरेर निस्केकी थिइन्।
बिद्यालयका चौकीदार बिश्वास यादवले त्यो दिन राधिका बिद्यालय नै नआएको बताए।
'बिहान आउने बिद्यार्थीहरुलाई म चिन्छुँ, अरू आएका थिए त्यो दिन उनी आइनन्,' यादवले भने। घरदेखि ५ सय मिटर भित्रैको दूरीमा रहेको बिद्यालय नपुगी बाटैबाट उनी हराएको घट्नाले परिवार मात्र होइन् टोलछिमेकलाई समेत हैरान पारेको छ।
'रहस्यमय किसिमले हराएकी छिन्, अरु केटी भएको भए कुनै केटासँग लाग्यो की भनी शंका हुन्थ्यो, उसको आनीबानी हेर्दा त्यस्तो शंकाको गुन्जाइस छैन्,' छिमेकी पुष्प तिमिल्सिनाले भने, 'उ हाम्रो टोल कै असल र सालिन केटी हो।'
बिद्यालयमा पनि राधिकाको छवी मिमिल्सिनाले भनेजस्तै छ। 'असल, सालिन र सामान्य आचरण की छात्रा हो ऊ,' बिद्यालयका प्रधानाध्यापक राजीव आनन्दले भने, 'बढी नबोल्ने, साथी पनि बढी नबनाउने शान्त स्वभावकी राधिका बेपत्ता भएकी घट्ना हामीलाई आफै पत्यार लागिरहेको छैन्।'
घरमा भएका मोबाइल टेलीफोन नम्बरका 'कल डिटेल'मा पनि कुनै शंकास्पद वा अपरचित नम्बरबाट फोन सम्पर्क देखिँदैन्। 'राधिकाका सहपाठीहरुसँग महिला अनौपचारिक प्रहरीले कुराकानी गरेर बुझ्दा उसको स्वभाव अन्तरमुखी रहेको बुझिएको छ,' प्रहरी उपरीक्षक दिवेश लोहनीले भने, 'उसले मोबाइल फोन बोक्ने वा कसैसँग अनावश्यक कुराकानी गरेको बुझिदैन्, परिवारले शंका जाहेर गरेका ब्यक्तिहरुसँग पनि हामीले सोधपुछ गरेका छौं, कुनै संकेत प्रमाण देखिदैन्, जटिल किसिमको घट्ना देखिएकोले यसलाई मसिनो रुपमा केलाई रहेका छौं।'