ओखलढुंगाको अधेरी नारायणस्थानमा भएको जीप दुर्घटनामा ७ जनाको मृत्यु हुनुका साथै १३ जना घाइते भएका छन्।
निशङ्खेबाट सदरमुकाम ओखलढुंगा तर्फ आउदै गरेको बा ५ च ५८७८ नम्बरको जीप आइतबार बिहान करिब १० बजेतिर सिद्धिचरण नगरपालिका ११ नारायणस्थानमा भएको दुर्घटनामा २ महिला सहित ७ जनाको ज्यान गएको जिल्ला प्रहरी कार्यालय ओखलढुंगाले जनाएको छ।
दुर्घटनामा घाईते भएका १३ जनालाई उपचारका लागि मिसन अस्पताल ओखलढुंगा लगिएको छ । घाईतेमध्ये एकजनाको अवस्था गम्भिर छ ।
ज्यान गुमाउनेहरुमा ठूलाछाप ७ बस्ने मनिराम भट्टराई, चोलेन्द्र खत्री, सरिता खत्री, तलुवाका टिका बस्नेत, ठूलाछाप ८ का तेजबहादुर बस्नेत, ठूलाछाप ४ का दोहिनी भट्टराई र वाप्सा ९ का महनकुमार राई रहेको जिल्लाका डिएसपी डम्बर विकले जानकारी गराए।
दुर्घटनाको कारण खुल्न नसकेको प्रहरीले जनाएको छ।
