तिहारमा भाइटीका लागएपछि पोखरामा विदेशी पर्यटकहरु। तस्विर : सागर राज तिमिल्सिना
संस्कृति र परम्पराका माध्यमबाट पर्यटन प्रवर्द्धन गर्ने उद्धेश्यका साथ पश्चिमाञ्चल होटल संघ पोखराले मंगलवार आयोजना गरेको आठौं भाइटीका महोत्सवमा विभिन्न देशका १८ पर्यटकले सहभागिता जनाएका छन्। महोत्सवमा वेलायत, अमेरिका, चीन, फ्रान्स, जर्मनी लगायतका देशका महिला तथा पुरुष पर्यटकले भाइ टीका लागाए। रेन्वो चिल्ड्रन होम नेपालका छात्राहरुले महोत्सवका सहभागी विदेशी पर्यटकलाई भाइटीका लगाइदिएका थिए।
जर्मनीबाट आएका पर्यटक विल्याण्ड सनरले भाइटीका महोत्सवमा टीका ग्रहण गर्न पाउँदा आफूलाई नौलो अनुभूति भएको प्रतिक्रिया दिए। 'रंगीविरंगी टीका, मानिसहरुको सौहार्दपूर्ण व्यवहार र देउसी भैलो खेल्ने परम्पराबाट म साँच्चै नै प्रभावित भएँ,' उनले आफ्नो अनुभव सुनाए। यस्तो प्रकारको कार्यक्रमले नेपालको पर्यटन प्रवर्द्धनमा सघाउ पुग्ने विश्वास व्यक्त गर्दै उनले आफू पहिलो पटक नेपाल आउँदा यसरी टीका लाउन पाउनु जीवनकै नौलो अनुभव रहेको सुनाए।
देशविदेशमा नेपाली परम्परा र संस्कृतिको प्रचारप्रसार तथा यसैको माध्यमबाट बढी भन्दा बढी पर्यटक नेपाल भित्र्याउने उद्धेश्यका साथ संघले यसप्रकारको महोत्सव आयोजना गरेको संघका अध्यक्ष हरिप्रसाद शर्मा गैह्रेले जानकारी दिए। आपसी भाइचार बढाउन समेत सघाउने यसप्रकारको महोत्सवलाई आगामी वर्षहरुमा पनि संघले निरन्तरता दिने उनले बताए।
भाइटिका संघले सुरु गरेको नौलो कार्यक्रम भएको र यसले पर्यटन प्रवर्द्धनमा टेवा पुग्ने विश्वास संघका महासचिव लक्ष्मण सुवेदीले व्यक्त गरे। विदेशीहरुलाई टिका लगाइदिएपछि नेपाली परम्परा अनुसार उपहारहरु विदेशी दाजूभाइ तथा दिदी बहिनीलाई प्रदान गरिएको थियो। सो अवसरमा विद्यार्थीले देउसी गीत र नाच प्रस्तुत गरेका थिए।संघले आयोजना गरेको यस्तो कार्यक्रमले देश विदेशमा नेपालको पर्यटन प्रवर्द्धनमा सघाउ पुग्ने मात्र नभई नेपाली संस्कृतिको सम्वर्द्धनमा समेत टेवा पुग्ने विश्वास संघले गरेको छ।
