रौतहटको फतुवा महेशपुर गाविस वडा नं ४ मा रहेको फूलमत महारानी मन्दिरमा भक्तजनले आज विशेष पूजाआजा गरेका छन्।
प्रत्येक वर्षको लक्ष्मीपूजाको भोलिपल्ट मात्र खुल्ने गरेको उक्त मन्दिरमा फूल तथा बलि पूजा गर्ने चलन रहिआएको छ।
विसं २०१५देखि उक्त गाविसमा रहेको फूलमत महारानी मन्दिरमा पूजाआजा गरेमा मनोकांक्षा पूरा हुने विश्वासका साथ बारा, पर्सा, सर्लाही तथा भारतको विहारबाट भक्तजनहरु फूल पूजा गर्न आउने गरेको मन्दिरका पुजारी खोमारी महतोले जानकारी दिए।
सो अवसरमा मन्दिर परिसरमा पूजाका लागि करिब १० हजार भक्तजन जम्मा भएका थिए।
वर्षमा एकपटक मात्र खुल्ला हुने सो मन्दिरमा दुई हजार बलिसमेत दिइएको थियो। सोही अवसरमा नेपाल रेडक्रस सोसाइटी रौतहटले सरसफाइसमेत गरेको थियो। रासस