सुनसरी, पाँचथर र उदयपुर जिल्लामा बिहीबार साँझ भएको आगलागीमा पाँच घर जली करिब आठ लाख पचास हजार बराबरको क्षति भएको छ।
सुनसरीको ईटहरी १ स्थित रोहित पराजुलीको घरमा राति १० बजे ग्याँस सिलिण्डर लिक भएर घरमा आगलागी हुँदा घर तथा घरभित्र रहेको सामान जलेर करिब पाँच लाख बराबरको क्षति भएको छ। आगो इटहरी नगरपालिकाको बारुणयन्त्र र प्रहरी मिलेर साढे ११ बजे नियन्त्रणमा लियो।
त्यस्तै सुनसरीकै देवानगंज ७ बस्ने जसिर अन्सारीको गोठमा बिहिबार साँझ करिब ८ बजे आगलागी हुँदा गोठ तथा गोठभित्र राखिएको बिस मन पटुवा जलेर करिब पचास हजारको क्षति भएको हो। गोठमा बालेको घुरबाट आगो सल्किएर आगलागी भएको थियो। आगो स्थानीयको सहयोगमा इलाका प्रहरी कार्यालय देवानगन्जबाट खटिएको प्रहरी टोली र स्थानीयले नियन्त्रण गरेको थियो।
यसैगरी उदयपुरको रामपुर ठोक्सीला ८ स्थित धोधन सदाको घरमा साँझ ७ बजे दिपावली गर्ने क्रममा अचानक लागि हुँदा घर तथा घरभित्र रहेको सामान जलेर करिब एक लाख बराबरको क्षति भएको छ।
यसैगरी पाँचथरको फिदिम नगरपालिका ४ स्थित ददिराम खत्रीको घरमा साढे १० बजे अचानक बिद्युत लाईन सर्ट भई आगलागी हुँदा घर तथा घरभित्र रहेको नगद सात हजार भारतीय रुपैया समेत जलेर करिब दुई लाख बराबरको क्षति भएको छ।