यौन दुर्ब्यबहारबाट आरोपित बीपी कोइराला स्वास्थ्य विज्ञान प्रतिष्ठानमा प्रोफेसर मुरारीलाल दासमाथि कुटपिट भएको छ। कुटपिटबाट उनको टाउको र अनुहारमा गम्भीर चोट लागेको छ।
उनको प्रतिष्ठानको आकस्मिक कक्षमै उपचार भइरहेको छ। पीडित भनाउँदाहरुले नै केही समूह लगेर उनीमाथि आक्रमण गरिएको प्रहरीले बताएको छ। माइक्रोबायोलोजी विभागमा कार्यरत निमित्त एचओडीसमेत रहेका प्रो दासलाई खाना खान जाने क्रममा कोठको सिडी उक्लिदै गर्दा हातपात भएको हो। टाउकोको दाहिने पट्टीको हड्डीसमेत भाँचिएको आशङ्का उपचारमा संलग्न डाक्टरहरुले गरेका छन्।
हातपातमा संलग्नहरु प्रहरीको हिरासतमा छन्। हिरासतमा पर्नेमा धरान १७ का सुवास राई, एकराज राई, आशा राई, चन्द्रकला राई, नविना राई र गीता राई छन्। पीडक भनिएका प्रो दासमाथि प्रतिष्ठानले आन्तरिक रुपमा छानविन गरिरहेकै बेला आक्रमण भएपछि घटनाले अर्को मोड लिएको छ।
हाडजोर्नी विभागका एडिस्नल प्रोफेसर एवं प्रवक्ता डा. पशुपति चौधरीले पीडित भनाउँदा बाटै कानुन हातमा लिने दुस्प्रयास भएकाले घटनाले उल्टो मोड लिने संकेत देखिएको बताए। अव प्रतिष्ठानले पीडित भनाउँदाहरु माथि नै कारबाहीको लागि प्रहरीलाई उजुरी दिने भएको छ। 'प्रतिष्ठानले नै उजुरी दिदै छ।, कानुन हातमा लिएर प्रतिष्ठानमा आएर गुण्डागर्दीशैलीमा गरेको कार्य भर्त्सनायोग्य छ।, उनले भने।
प्रो दासमाथि प्रतिष्ठानमा करारमा नियुक्त एक कर्मचारीमाथि यौन दुर्व्यबहारको आरोप लागेको थियो। ती कर्मचारी डब्लुएचओको प्रोजेक्टमार्फत पहिलो पटक करारमा छ महिने जागिर खाएकी थिइन् भने पुनः अर्को प्रोजेक्टमार्फत ४ महिने करारमा जागिर खाएकी थिइन्। तर, त्यही बेला नै प्रो. दासले आफूमाथि दुर्ब्यबहार गरेको अभियोग लगाएकी थिइन्।
सो दुर्व्यबहार बारे असोज २१ गते पत्रकार सम्मेलन गर्दै घटना बाहिर ल्याएका छन् भने २३ गते प्रतिष्ठानमा निवेदन दिएका थिए। निवेदन उपर सत्यतथ्य पत्ता लगाएर कारबाही गरिने प्रतिवद्धतासमेत जनाएको थियो।