बाराको अमलेखगन्जमा सवारी दुर्घटना हुँदा ५ जनाको मृत्यु भएको छ। पूर्व पश्चिम राजमार्गको अमलेखगन्जस्थित ४ नम्बर पुल नजिकैको सडकखण्डमा बुधबार बिहान भएको दुर्घटनामा ५ जनाको घटनास्थलमै मृत्यु भएको छ भने ३१ जना घाईते भएका छन्।
घाईते मध्ये १७ जनाको अबस्था गम्भीर छ। मृत्यु हुनेमा बारा मनहर्वा ७ की ५० वर्षीया कुन्ता दाहाल,नेपाल विद्युत प्राधिकरणमा कार्यरत ४५ वर्षीया लक्ष्मी तामाङ र उनका १८ वर्षीय छोरा प्रवेश तामाङ तथा खटुवा प्रसौनी ८ का २२ वर्षीय अमृत कुमार नेपाल लगायत ५ जनाको मृत्यु भएको प्रहरीले जनाएको छ।
बुधबार बिहान पौने ९ बजे यात्रुबाहक बस, ट्यांकर र ट्रक एक आपसमा ठक्कर खादा उक्त दुर्घटना भएको अञ्चल प्रहरी कार्यालय नारायणी बीरगन्जले जनाएको छ। बीरगन्जबाट काठमाडौं तर्फ तिब्र गतिमा गईरहेको ना ४ ख १५४४ नम्बरको यात्रुबाहक बसलाई, ना ३ ख ६२८५ नम्बरको मालबाहक ट्रकले उछिन्ने क्रममा बस र अर्काे ना ३ त ८७११ नम्बरको ट्याकरलाई ठक्कर दिँदा सो दुर्घटना भएको मध्यक्षेत्रीय ट्राफिक प्रहरी कार्यालय पथलैया बाराका प्रहरी उपरीक्षक उमेश रन्जितकारले बताए।
दुर्घटनामा घाईते भएका ब्यक्तिहरुको भरतपुर बीरगन्जस्थित नारायणी उपक्षेत्रीय अस्पताल र हेटौडा अस्पतालमा उपचारका लागि पठाईएको मध्यक्षेत्रीय ट्राफिक प्रहरी कार्यालय पथलैया बाराका प्रहरी उपरीक्षक उमेश रन्जितकारले जानकारी गराएका छन्।
दुर्घटनापछि अबरुद्ध राजमार्ग ११ बजेपछि डोजर लगाएर दुर्घटनाग्रस्त गाडी सडकबाट हटाएपछि यातायात सञ्चालनमा ल्याएको अञ्चल प्रहरी कार्यालय नारायणी बीरगन्जले जनाएको छ।
दुर्घटनाका बारेमा समेत थप अनुसन्धान भईरहेको र घाईतेहरुको उपचार तथा मृतकको सनाखत गर्ने काम अहिले बीरगन्जस्थित नारायणी उपक्षेत्रीय अस्पतालमा भईरहेको अञ्चलल प्रहरी कार्यालय नारायणी बीरगन्जका बरिष्ठ प्रहरी उपरीक्षक मनोज न्यौपानेले बताए।
