नक्कली डिभिडी भिडियो, सिडी बनाएर बिक्री–वितरण गरेको आरोपमा सिन्धुपाल्चोक मेलम्चीमा पसल गरी बस्ने चारजनालाई प्रहरीले पक्राउ गरेको छ।
मेलम्चीस्थित दुलाल मोबाइल हाउसका गणेश दुलाल, चालिसे मोबाइल सेन्टरका श्याममणि चालिसे, याङग्रिमा मोबाइल हाउसका मेलम्चीमा पसल सञ्चालन गरी बस्ने स्थायी घर पाल्चोक गाविस–२ भएका दावा तामाङ र मोहन वाच सेन्टरका मोहन गौतमलाई प्रहरीले मङ्गलबार पक्राउ गरेको हो।
विभिन्न कलाकारको गीतसङ्गीत, नेपाली फिल्म, लेखरचना एकबाट अर्कोमा कपी गरी बिक्री–वितरण गरेको आरोपमा उनीहरु पक्राउ परेका हुन्।
प्रहरीले पाँचवटा कम्प्युटर, केही खाली सिडी र भरेको डिभिडी तथा मेमोरी कार्डसमेत बरामद गरेको छ। उनीहरुमाथि अनुसन्धान कार्य जारी रहेको र प्रमाणित भएपछि नेपाल प्रतिलिपि अधिकार ऐनअन्तर्गत कारबाही हुने इलाका प्रहरी कार्यालय मेलम्चीका प्रहरी निरीक्षक चन्द्रबहादुर थापाले बताए। रासस
