भारतको पश्चिमी भागमा एक दयालु व्यापारीले आफ्ना एक हजार २०० कामदारलाई उनीहरूले देखाएको समर्पणका लागि नयाँ गाडी, आवास तथा हजारौँ अमेरिकी डलर पर्ने हिराका गहना पुरस्कार दिएका छन्।
सुरत नगरका हिरा व्यापारीले हिन्दुको प्रमुख चाड दिवाली अगाडि आइतबार आफ्ना कर्मचारीलाई एक समारोहमा ती महङ्गा उपहार दिएका हुन्।
सब्जीभाइ ढोलकियाको कम्पनीमा कर्मचारीले देखाएको समर्पण कार्यक्रममा उनीहरूका पत्नीलाई समेत गरी ५० करोड भारतीय रूपैयाँ बराबर पुरस्कार दिइएको छ।
हरिकृष्ण एक्पोर्टका अध्यक्ष ढोलकियाले आफ्ना कर्मचारीले वर्षौसम्म कम्पनीको विकासका लागि गरेको योगदानका लागि पुरस्कार दिइएको बताए।
उनले यी कर्मचारीले व्यापारिक कम्पनीको प्रगतिका लागि आफ्नो पारिवारिक जीवन बलिदान गरेको र उनीहरू पुरस्कार पाउन हकदार भएको बताए। सुरत हिरा चम्काउने तथा निर्यात गर्ने प्रमुख केन्द्रको रूपमा रहेको छ।
भारतमा दिवालीको चाडका समयमा प्रायः कामदारले उनीहरूका मालिकबाट कुनै न कुनै प्रकारका उपहार पाउँछन् र त्यसमा प्रायः मिठाइ पर्छन्।
ढोलकियाको जटिल समर्पण कार्यक्रममा कर्मचारीले विभिन्न २५ आधारमा अङ्क पाउने गर्छन्। यो कार्यक्रम गत पाँच वर्षदेखि सञ्चालन भइरहेको छ र यस वर्ष यसले नयाँ उचाइ लिएको छ।
उनले यस वर्ष २०७ कर्मचारीलाई आवास, ४९१ कर्मचारीलाई गाडी तथा ५०० कर्मचारीलाई गहना पुरस्कार दिइएको बताए।
उनले आवास नभएका कर्मचारीलाई आवास दिइएको र आवास भएका कर्मचारीलाई गाडी दिइएको पनि बताए।
अधिकतम पाँच हजार ८६० अमेरिकी डलर पर्ने गहना केही कर्मचारीलाई उनीहरूको पत्नीको उपस्थितिमा दिइएको छ। उनले यी कर्मचारीका परिवारले व्यापारिक संस्थाको प्रगतिमा अप्रत्यक्ष रूपमा योगदान दिएको बताए।
एक कर्मचारी गौरव दुग्गलले यस कम्पनीमा आफ्नो दुई वर्षको अनुभव ब्याख्या गर्नै नसकिने भएको बताए।
उनले कम्पनीले आफूलाई दिएको गहना अमूल्य भएको र त्यसले आफू र आफ्नो परिवारलाई देखाएको भावना स्पष्ट पार्ने बताए।
ढोलकियाको कम्पनीले विश्वका ७५ मुलुकमा गहना निर्यात गर्छ।
