काग तिहारको अवसरमा मंगलबार राजधानीको शान्ति वाटिकामा कलाकार रमेश दुलालले काग सम्मेलन गरि माघ ८ गते संविधान जारी नगरे काठमाडौंमा भएका सबै काग भेला गरी संविधानसभा भवन घेर्ने चेतावनी दिएका छन्।
दुलालले कागको आवाज निकाले र कागहरुलाई बोलाउँदा सयौं कागहरु कराउँदै उनको वरिपरी आकाशमा घुमेका थिए। उनले काग खुशी हुँदा, आपत परेको बेला र झगडा परेको बेला निकाल्ने आवाजले कागलाई आकर्षण गरेका थिए।
दुलालले संविधान निर्माण गर्न पनि दबाब पुगोस भन्ने उद्देश्यले काग सम्मेलन गरेको प्रष्ट पार्दै भने–'मैले हरेक वर्ष काग तिहारको दिन काग सम्मेलन गर्दै आएको छु। यो सम्मेलनले नेपालमा शान्ति, सुव्यस्था तथा अमनचयन हुन मद्यत पुग्नेछ।'
उनले दलहरुले तोकिएकै मिति माघ ८ गते संविधान जारी नगरे उपत्यकाका सम्पूर्ण काग भेला गरि संविधानसभा भवन, राष्ट्रपति भवन , सिंहदरवार र शीर्ष नेताहरुको घर घेर्ने समेत चेतावनी दिएका छन्।
उनले विभिन्न चराचुरुङगी र जनावरको आवाज निकाल्ने गर्छन्। चराचुरुङगी र जनावरको आवाज निकालेर मनोरञ्जन गराएबापत उनले विभिन्न पुरस्कार प्राप्त गरिसकेका छन्। दुलालको यो ११ औं काग सम्मेलन हो।