हुदहुद आँधीका कारण गत असोज २७ र २८ गते हिमाली क्षेत्रमा हिमपात भई अहिलेसम्म ३३ जनाको मृत्यु र आठ जना अझै बेपत्ता भएको घटनाले नेपाल सरकारलाई सचेत बनाएको छ।
सो घटनामा सरकारले ११ वटा हेलिकोप्टरसहित उद्धारकर्मीहरु परिचालन गरेर ५१८ जनाको उद्धार गरेपनि ३३ जनाको मृत्यु असामान्य घटना हुन पुग्यो।
हिमपात हुनसक्ने पूर्वसूचना गरिए पनि भारी हिमपात हुनसक्ने संयन्त्रको प्रयोग गर्न नसक्नु, सम्बन्धित पर्यटकलाई सम्भावित घटनाबारे सूचना प्रवाह गर्ने संयन्त्रको विकास नगरिनु, पर्यटक प्रस्थान गर्दा नाम दर्ता गराए पनि फर्किंदा जानकारी नगराउनु र समयमै सचेतता अपनाउन नसक्दा मृतक वा बेपत्ताको यकिन विवरण आउन कठिन भएको हो।
गृह मन्त्रालयमा मंगलबार आयोजित पत्रकार सम्मेलनमा सचिव सूर्यप्रसाद सिल्वालले आगामी दिन सरकारले यस्ता घटनामा विशेष सजकता अपनाउने जानकारी दिए।
मनाङ, मुस्ताङ, म्याग्दी र कास्कीलगायतका क्षेत्रमा करिब नौ फिटसम्म हिमपात भएकाले बेपत्ता भएका आठ जनाको उद्धार कार्यमा कठिनाइ आएको चर्चा गर्दै उनले प्रायः नेपाली पर्यटकले नाम दर्ता नगराउने गरेकाले पनि बेपत्ताको सङ्ख्या अझै बढ्नसक्ने आशङ्का प्रकट गरे।
नेपाली सेनाको हेलिकोप्टरबाट सहसेनानी गुमान सिंह र किशोर अधिकारीको टोलीले डोल्पा र मुस्ताङ जिल्लाको सीमामा पर्ने मायाङ्ग भन्ज्याङमा १७ हजार ५० फिटको उचाइमा समेत उडान गरी साहसिक उद्धार कार्य गरेको जानकारी दिँदै उनले सो घटनामा परी हालसम्म मुस्ताङमा २४, म्याग्दीमा पाँच, मनाङमा तीन र कास्कीमा एक जनाको दुःखद् निधन भएको, मृतकमध्ये १७ जना नेपाली र पोल्यान्ड, इजरायल, स्लोभाकिया, भारत, चीन तथा जापानका १६ जना नागरिक भएको बताए। उनका अनुसार ११ नेपाली र दश विदेशीको शव अझै त्रिवि शिक्षण अस्पतालमा रहेका छन्।
हिमपातका घटनामा केही सञ्चारमाध्यमबाट भ्रमपूर्ण समाचार सम्प्रेषित हुनु दुःखद् भएको उल्लेख गर्दै सचिव सिल्वालले नेपालले पदयात्रास्थल बन्द गर्यो भन्ने विदेशी सञ्चारमाध्यमका समाचार असत्य भएको पनि जानकारी दिए। रासस
