प्रहरीले पटक पटक चाँदीसहित भरियालाई पक्राउ गरेपनि बीरगन्जको मुख्य नाकाबाटै भारततर्फ चाँदी तस्करीको कार्य रोकिएको छैन। वीरगन्जको रजत जयन्ती चौकदेखि शंकराचार्यद्धारसम्म प्रहरी, भन्सारका कर्मचारी तथा सशस्त्र प्रहरीको आधा दर्जन चेकजाचहरु हुने गरेको छ। तरपनि वीरगन्जको मुख्य नाकाबाट चाँदीको तस्करी व्यापक रुपमा भइरहेका प्रहरीको दाबी रहेको छ।
चांदीसहित भरियालाई प्रहरीले पक्राउ गरेपनि मुख्य कारोवारीलाई पक्राउ गर्न नसकेकोले चाँदीको तस्करीका कमि नआएको नारायणी अञ्चल प्रहरी कार्यालयका एक अधिकृतले बताए।
विशेष सुराकीको आधारमा सोमबार बिहान नारायणी अञ्चल प्रहरीले ठूलो परिणामा चाँदीसहित एक भरियालाई पक्राउ गरेको छ। वीरगन्जको मुख्य नाकाबाटै अवैध रुपमा भारततर्फ चाँदी तस्करी गरेर लैजाँदै गरेको अवस्थामा प्रहरीले भरियालाई बीस किलो चाँदीसहित पक्राउ गरेको छ।
चाँदीको मुल्य बाह्र लाख रहेको प्रहरीले जनाएको छ। नारायणी अञ्चल प्रहरी कार्यालयबाट खटिएको प्रहरी टोलीले आइतबार साँझ ना २ प ८७८८ नम्बरको मोटरसाइकलमा सवार वीरगन्ज उपमहानगरपालिका वडा नम्बर ३ छपकैयाँ निवासी ३३ वर्षीय विजय सर्राफको साथबाट शंकरचार्य गेट नजिकै चाँदी बरामद गरेको हो।
मोटरसाइकलको सिट मुनीबाट उक्त चाँदी बरामद गरिएको नारायणी अञ्चल प्रहरी कार्यालयका प्रहरी नायब निरीक्षक अरुण कुशवाहाले जानकारी दिएका छन्।
बरामद गरिएको चाादी माईस्थान बजारमा अवस्थित एनपी पायल अर्नामेन्टका सञ्चालक नथुनी सर्राफ र वीके ज्वेलर्सका सञ्चालक समेत रहेका भुलन सर्राफको भएको प्रहरीको अशंका गरेको छ।
प्रहरी नायब निरीक्षक कुशवाहाले बरामद गरिएको चाँदीको श्रोत, वैधानिकता र चाँदी खरिद गर्ने व्यापारीबारे थप अनुसन्धान भइरहेको जानकारी दिएका छन्।