असोज २७ र २८ गते भएको हिमपातमा परेर मनाङबाट मुस्ताङका लागि हिँडेका ६० जनाभन्दा बढी बिदेशी पर्यटक सर्म्पकविहीन छन्। अन्नपूर्ण संरक्षण क्षेत्र आयोजना (एक्याप) इलाका संरक्षण कार्यालय जोमसोमले दिएको जानकारी अनुसार विश्वको साहसिक पदमार्गमा यात्रा लागि आएका विभिन्न देशका ६० भन्दा बढी पर्यटक सम्पर्कबिहिन बनेका हुन्।
नेपालीहरू भने कति हराई रहेका छन् भन्ने कुनै गणना छैन। एक्यापमा नेपाली पर्यटकहरुले दर्ता हुन नपर्ने भएका कारण पनि हराउने नेपालीको संख्या थाहा हुन नसकेको हो। अन्नपूर्ण पदयात्राको साहासीक गन्तब्य थोराङ्ला भञ्ज्याङ पास गर्न मनाङबाट मुस्ताङका लागि हिडेका तीन सय ५६ जना बिदेशी पर्यटक मध्ये आईतबारसम्म २ सय ९६ जना सर्म्पकमा आएको एक्याप जोमसोमका प्रमुख बिदुर कुईकेलले जानकारी दिए।
उनका अनुसार मनाङ र मुस्ताङको पदयात्रामा निस्कीएका मध्ये अझै ६० जना एक्याप र सुरक्षा निकायको सर्म्पकमा नभएको बताए। उनीहरु हिउमा नै हराएको, फर्केको वा एक्यापमा इन्ट्री नगरी गएको समेत हुन सक्ने उनले बताए। एक्याप जोमसोमको तथ्याक अनुसार असोज २८ गते ७८ जना, २९ गते १४४ जना, ३० गते ४४ जना, ३१ गते १० जना, कात्तिक १ गते २० जना र २ गते एक जना बिदेशी नागरिक एक्यापको सर्म्पकमा आएका छन्।
हालसम्म मनाङ र मुस्ताङमा हिमपातका कारण ज्यान गुमाउने पदयात्रीको संख्या ४० जनाभन्दा बढि छ। हिमपातको घटनापछि स्वदेशी तथा विदेशी पर्यटकको संख्या ह्वात्तै घटेपनि मौसममा सुधार आएपछि कतिपय पर्यटकले पदयात्रालाई निरन्तरता दिइरहेका छन्।
साहसिक गन्तब्यको रुपमा ख्याती कमाएको अन्नपूर्ण फेरोको थोराङपासमा भने केहि समयका लागि पर्यटकलाई जान रोक लगाएको छ। अन्नपूर्ण फेरोको थोराङपासभन्दा तल र अन्य क्षेत्रमा जान भने रोक नलगाएको टानले जनाएको छ।
