नेपाल सरकारले दैलेख जिल्ला प्रशासन कार्यालय मार्फत वितरण हुने गरी आसन्न महान चाड दशैंलाई समेत ध्यानमा राखी प्रत्येक राउटे परिवारलाई प्रति परिवार रु १०,०००।-(दश हजार) का दरले रकम उपलब्ध गराउने निर्णय गरेको छ।
प्रधानमन्त्री तथा मन्त्रिपरिषद्को कार्यालयका सचिव श्री शान्तराज सुवेदीका अनुसार केही समयअघि दैलेखबाट आएका राउटेहरुले प्रधानमन्त्री सुशील कोइरालालाई भेटी आफूहरुलाई दशैं लगायतका चाडपर्व मनाउन आर्थिक अभाव भएकोले सरकारले सहयोग गर्न अनुरोध गरेका थिए।
दैलेखमा रहेका ४० परिवार राउटेहरुको लागि प्रति परिवार दश हजार रुपैयाका दरले चार लाख अर्थ मन्त्रालयले गृह मन्त्रालयलाई तत्काल निकासा दिई जिल्ला प्रशासन कार्यालय दैलेख मार्फत वितरण गर्न असोज २ गतेको मन्त्रिपरिषद्ले निर्णय गरेको हो।
दसैं नजिक आइसकेको तर सरकारी विधि र प्रक्रिया अनुसार रकम निकासा भइ राउटेहरुको हातमा पुग्न लामो समय लाग्ने जसबाट राउटेहरुले सरकारले उपलब्ध गराएको रकमले दसैं मनाउन नपाउन सक्ने अवस्था सृजना हुन सक्ने जिज्ञासामा सचिव सुवेदीले छिटो निकासा गराई रकम उपलब्ध गराउने, कुनै कारणवस समयमा रकम पुग्न नसकेमा जिल्ला प्रशासन कार्यालयले कार्यालयको धरौटी लगायत मिल्दो शीर्षकबाट दशैं अगाडी नै रकम उपलब्ध गराउन र सोको सोधभर्ना निकासा रकमबाट गर्ने समेत निर्देशन दिएको बताए।