बीपी कोइराला स्वास्थ्य विज्ञान प्रतिष्ठानको ३६ औं प्रतिष्ठान सञ्चालक परिषद् (सिनेट) ले तलव वृद्धि नगरेको विरोधमा कर्मचारीले आन्दोलन सुरु गरेका छन्।
आन्दोलनको पहिलो दिनै जिओपिडी अघि धर्नासँगै प्रतिष्ठान प्रशासनको चार जना पदाधिकारीहरुको कार्याकक्षमा अनिश्चितकालीन तालाबन्दी गरेका छन्। कर्मचारीहरुको कर्मचारी कल्याण समाजले गतवर्ष सरकारले वृद्धि गरेको १८ प्रतिशत तलव, १ हजार भन्दा र अन्य सुविधाहरु दिने सहमति लत्याएको भन्दै आन्दोलन थालेका हुन्।
प्रतिष्ठानका उपकुलपति प्रा.डा. बलभद्रप्रसाद दास, रजिष्टार तुलबहादुर श्रेष्ठ, शिक्षाध्यक्ष प्रा.डा. बिक्रम श्रेष्ठ र अस्पाल निर्देशक प्रा.डा. अरविन्दा सिंन्हाको कार्याकक्षमा अनिश्चितकालीन तालाबन्दी गरेका हुन्। तालाबन्दी लगत्तै रजिष्टार तुलबहादुर श्रेष्ठले विज्ञप्ति जारी गर्दै तालाबन्दीप्रति ध्यानाकर्षण भएको जनाएको छ।
शिक्षक कर्मचारीको तलव वृद्धि, २५ प्रतिशत प्रोत्साहन भत्ता र अन्य विविध विषयहरुमा प्रतिष्ठानको आन्तरिक स्रोत पहिचान गर्दै प्रतिष्ठानको क्षमता अनुसार दिने बारेमा एक उच्चस्तरीय तलवमान आयोग नै बनेको छ। पूर्व उपकुलपति प्रा.डा. शेखर कोइरालाको संयोजकत्वमा बनेको ५ सदस्यीय आयोगले प्रतिष्ठानको अवस्था बारे विश्लेषण गरी सुझावसहितको प्रतिवेदनपछि अघि बढ्ने योजना हुँदा हुदै आन्दोलन गर्नु न्यायोचित नभएको श्रेष्ठले जारी गरेको विज्ञप्तिमा उल्लेख छ।
तर, कर्मचारी कल्याण समाजका अध्यक्ष सुजेन्द्र गोलेले पदाधिकारीहरुले सिनेटमा सहमति लत्याएको निश्कर्ष निकाल्दै तालाबन्दी गरिएको बताए। त्योसँगै युनियनै खारेज गर्नेसम्मको कुरा उठेकाले पनि आफूहरु आन्दोलित बनेको बताएका छन्। उनले आफूहरुको माग पूरा नभएसम्म अनिश्चितकालीन तालबन्दी भइरहने बताएका छन्।
उनले सिनेटपछि आउँदा कि त राजिनामा कित माग पूरा गर्न चेतावनी दिएका छन्। सिनेटले सर्टिफिकेट नर्सिङ, विएन नर्सिङ, विएस्सी एमएलटी र एमडि गर्नुपूर्व गरिने ४ महिने वि्रजकोर्षलाईसमेत हटाउने निर्णय भएको छ। यसले पनि विद्यार्थीहरु मारमा पर्ने देखिएको छ। विश्वविद्यालय बनाउने निर्णय अनुरुप सेवाहरु कटौती गर्दा यस्तो अवस्थामा कसरी विश्वविद्यालय हुन सक्ला भन्दै विद्यार्थीहरुले कुरा उठाएका छन्।
सिनेटमा विद्यार्थीहरुको तर्फबाट प्रतिनिधित्व गरेका विद्यार्थी कल्याण समाजका अध्यक्ष रोशन आचार्यले कोर्ष हटाउने निर्णय गलत भएको बताए। यो कोर्ष हटाउने निर्णय एकेडेमिक कमिटिबाट पास गरेको छ।
